Шахмұрат Мүтәліп қаза тапқан әскери қызметшілердің отбасына 25 млн теңгеден беретінін айтты
Айтуынша, бұл көмек атаулы түрде, мемлекеттік қолдауға қосымша көрсетіледі.
«Бүгін Каспийдегі оқу-жаттығу кезінде әскери қызметшілеріміз қаза тапты. Мемлекет басшысы марқұмдардың отбасына көңіл айтып, оларға барлық қажетті көмек көрсетуді тапсырды және ертеңгі күнді жалпыұлттық аза тұту күні деп жариялады. Ең алдымен Қазақстан Халық Кеңесінің мүшесі ретінде, сондай-ақ кәсіпкер ретінде осынау қайғыны теңдей бөлісуді парызым деп санаймын. Президент Қасым-Жомарт Кемелұлы Тоқаевтың үндеуін қолдай отырып, Integra Construction KZ компаниясынан қаза тапқан әрбір әскери қызметшінің отбасына 25 миллион теңгеден қаржылай көмек бөлінетінін хабарлаймын. Көмек атаулы түрде, мемлекеттік қолдауға қосымша көрсетіледі. Ешқандай қаражат ата-анаға баласын қайтармайды, әрине. Бірақ мұндай сәтте бірде-бір отбасы өз қайғысымен жалғыз қалмауы керек. Біздің еліміз қашанда осындай сәтте өзінің бірлігін көрсеткен. Қаза тапқандардың туған-туыстарына және қарулас жолдастарына көңіл айтамын, оларға сабыр мен төзім тілеймін», - деді Шахмұрат Мүтәліп.
Сонымен қатар кәсіпкер, продюсер Алмас Жәли де қаза тапқан әскери қызметшілердің отбасына қаржылай қолдау көрсететінін мәлімдеді.
«Досым Шахмұрат қаза тапқан жігіттердің отбасыларына қаржылай қолдау көрсетуді ұйғарды. Мен де осы игі іске қосылып, әр отбасыға қаржылай қолдау білдіргім келеді. Әрине, бұл олардың қайғысын мүлдем жеңілдете алмайды. Бірақ дәл осындай сәтте қолдан келгенше жанынан табылу — біздің ең аз дегенде жасай алатын ісіміз. Қиын күнде халықтың күші — бірлікте. Осындай ауыр сәтте ел болып бірігіп, бір-бірімізге тірек болайық», - деді кәсіпкер.
