Елдегі халықтың 80% газбен қамтылады
Бұл туралы Энергетика министрлігі мәлімдеді. Ол үшін ведомство магистральдық газ тасымалдау инфрақұрылымым мен өңірлік желілерді кешенді дамытпақ.
Мәселен, «Есіл – Астана» жобасы солтүстік өңірлерді газдандыру үшін стратегиялық маңызға ие. Ол Астана, Көкшетау және Петропавл қалаларын көгілдір отынмен қамтамасыз етеді. Ал «Бейнеу – Бозой – Шымкент» газ құбырының екінші желісі оңтүстік және орталықтағы сұранысты жабады. Тағы бір бастама Ақтөбе облысындағы КС-14 компрессорлық станциясынан Қостанай қаласына дейін газ құбырын салу. Бұл солтүстік өңірлерді одан әрі газдандыруға қосымша құрал. Бұдан бөлек, ұзындығы шамамен 302 шақырым «Талдықорған – Үшарал» құбыры Жетісу облысынан өтіп, 84 елді мекенге табиғи газ жеткізуге жол ашады. Жоба 2025 жылы пайдалануға берілді. Ведомствоның хабарлауынша, елдің басқа облыстарында да жеткізуші және тарату газ желілерінің құрылысы жалғасады.
