Жазатайым оқиғалардан міндетті сақтандыру шартын онлайн рәсімдеу сервисі іске қосылды

Мемлекеттік аннуитеттік компания өз сайтында жұмыс берушілерге кеңсеге бармай-ақ, жазатайым оқиғалардан міндетті сақтандыру шартын өз бетінше рәсімдеуге мүмкіндік беретін жаңа онлайн-сервисті іске қосты, деп хабарлайды 24KZ. 

Енді шартты жасасудың барлық кезеңі – жүйеге тіркелу, мәліметтерді енгізу, сақтандыру құнын есептеу, құжатты қалыптастыру және оған қол қою толығымен онлайн режимде жүзеге асады. Қажетті анықтамалар мен құжаттар тікелей портал арқылы жүктеледі.

Мәліметтердің бір бөлігі мемлекеттік ақпараттық жүйелер мен Бірыңғай сақтандыру дерекқорынан автоматты түрде алынса, қалған ақпаратты жұмыс беруші өзі толтырады. Сонымен қатар, қол қойылғанға дейін деректерді тексеріп, түзетуге мүмкіндік қарастырылған. Шартты рәсімдеу үшін заңды тұлғаның жарамды электрондық цифрлық қолтаңбасы (ЭЦҚ) болуы қажет.

Онлайн-сервистің іске қосылуы, ең алдымен, жұмыс берушілер үшін сақтандыру рәсімін барынша ыңғайлы әрі қолжетімді етуге бағытталған. Рәсімді цифрлық форматта өз бетінше жүзеге асыру уақытты үнемдеуге және кеңсеге бармай-ақ қажетті қызметті алуға мүмкіндік береді, – деді Мемлекеттік аннуитеттік компанияның басқарма төрағасы Олжас Ашкеев.

Айта кетейік, жазатайым оқиғалардан міндетті сақтандыру – қызметкерлерді әлеуметтік қорғаудың маңызды тетіктерінің бірі. Заңнамада көзделген жағдайларда бұл сақтандыру төлемдері еңбекке қабілеттіліктен айырылуға байланысты келтірілген зиянды, сондай-ақ емделуге, медициналық және кәсіптік оңалтуға жұмсалатын шығындарды толық өтеуді қамтамасыз етеді.