Венгрияда мұғалімдер шеруге шықты
Венгрия астанасы Будапеште бас көтерген мұғалімдер мен оқушылар полициямен қақтығысты, деп хабарлайды «Хабар 24».
Тәртіп сақшылары премьер-министр кеңсесінің жанына дейін келіп, шектен шыққан шерушілерге көз жасаурататын газ шашты. Полиция ереуілшілердің құрылыс үшін орнатылған қоршауды бұзғанын және полицияға қоқыс лақтырғанын алға тартады. Осындай бұзақылыққа барған 5 белсенді қамауға алынды.
Мұғалімдер үкімет қабылдағалы жатқан заң жобасына қарсы. Жаңа құжат бойынша, ұстаздардың күнделікті жұмыс уақыты 8 сағаттан 12 сағатқа көбеюі мүмкін.
Тұрғындар:
- Билік мұғалімдермен келіссөз жүргізіп жатырмыз деп уақыт созып, Еуроодақты алдап жүр. Бір қарасаң, заң жобасын жұмсартып жатқан сияқты. Бірақ мұның бәрі жалған. Жаңа құжатта бізге қысым жасағаннан басқа ештеңе жоқ.
- Мұғалімдерімізге обал. Айлығы шайлығына жетпей жүргенде жұмыс көлемін арттырып, оларды одан сайын шаршататын болды. Біз мұны мұғалімдердің хақына қол соғу деп қабылдаймыз.