29 маусым – 3 шілде аралығында Әзербайжанда Бірінші Түркология құрылтайының 100 жылдығына арналған «Түркі дүниесі апталығы» өткізіледі, деп хабарлайды «24KZ» .
Ғылым және мәдениетке қатысты бірқатар іс-шаралардан тұратын апталық Президент Ильхам Әлиевтің 2025 жылғы 22 қазандағы Жарлығына сәйкес ұйымдастырылады.
Апталық Мәдениет министрлігі, Әзербайжан Ұлттық Ғылым академиясы (ӘҰҒА), Ғылым және білім министрлігінің бірлескен ұйымдастыруымен, Түркі мемлекеттері ұйымы, ТҮРКСОЙ, Баку мемлекеттік университеті, Түркі академиясы, Түркі мәдениеті және мұра қоры серіктестігімен өткізіледі.
Апталықтың негізгі іс-шарасы «Бірінші Түркология құрылтайы: жүз жылдық ғылыми және мәдени мұра» атты халықаралық конгресс болады. 29 маусымда Гейдар Әлиев орталығында ашылу салтанаты өтетін конгреске 20 елден 80 түркітанушы ғалым және халықаралық ұйымдардың өкілдері қатысады. Сондай-ақ Баку мемлекеттік университетінің ұйымдастыруымен халықаралық конференция өтеді.
30 маусымда ӘҰҒА Президиумының ғимаратында панельдік талқылау, сол күні Жағажай ұлттық саябағында концерт болады.
1 шілдеде қатысушылар Қарабахқа (Ағдам, Шуша, Ханкенди) сапар жасайды. Ағдам Мугам орталығында Гусейн Джавидтің «Ібіліс» қойылымы көрсетіледі.
2 шілдеде Қарабах университетінде панельдік сессия өтеді, түркітанудың келесі ғасырға арналған басым бағыттарын анықтайтын қорытынды құжат қабылданады. Сол күні Бакуда тарих мұражайында мерейтойлық көрме, Ұлттық кітапханада Түркі дүниесі кітапханалары бірлестігінің конференциясы болады.
3 шілдеде Ұлттық бейнелеу өнері мұражайында «Әли бек Гусейнзаде» семинары, Низами кино орталығында фильм көрсетімімен апталық жабылады.
«24KZ» Telegram-арнасына жазылыңыз