Димаш Құдайберген «шекараларды бұзып», жаңа визуалды туындысын ұсынды

Қазақстандық әнші Димаш Құдайберген DIMENSIONS шығармашылық жобасының «Шекараларды бұзып» деп аталатын екінші тарауын таныстырды, деп хабарлайды 24KZ dimashnews басылымына сілтеме жасап.

Басылымның мәліметінше, жобаның бұл бөлімінде 3D-пиксель элементтері арқылы түрлі өлшемдердің тоғысқан бейнесі жасалған. Цифрлық бөлшектер экран шекарасынан асып шығып, шынайы және виртуалды кеңістікті өзара байланыстырады. Осы арқылы классикалық вокал өнері мен заманауи авангардтың тоғысқан тұсы көрсетіледі.

Димаш шексіз ыдырап, қайтадан тұтасып отыратын фрагменттер қоршауында, былғарыдан тігілген техвир стиліндегі бейнеде көрініс табады. Бұл — әлем оған бір кездері таңған жалғыз белгіден арылып, өзіндік болмысын қайта танытқан адамның бейнесі. Жалпы алғанда, осы цифрлық визуалды тіл оның сан алуан бағыттарды бойына сіңірген әрі әр түрлі сипатқа ие бола алатын музыкалық болмысын айқын аңғартады, - деп жазды шығармашылық ұжым. 

DIMENSIONS жобасы арқылы Димаш шығармашылық шекарасын кеңейтіп, музыка мен визуалды өнердің жаңа үйлесімін ұсынады. Дегенмен оның барлық ізденісінің негізінде әнге деген шынайы махаббаты қала бермек.