Жезқазғанда елімізде құрастырылған жаңа автобустар жолға шықты

Жезқазғанда қоғамдық көлік паркі жартылай жаңарды. Саран қаласындағы зауытта құрастырылған жиырма жаңа автобус желіге шықты, деп хабарлайды ҚазАқпарат.

Жаңа автобустар № 1, 3, 6, 8 сияқты төрт қалалық маршрутқа қызмет етеді. Жезқазғандықтар жаңа көліктің жайлылығына оң баға берді. «Автобустар заманауи, Саран қаласындағы «QazTehna» ЖШС зауытында жасалған. Олар «Евро-5» стандартына сәйкес келеді, бейнебақылаумен, пандустарды көтеру жүйелерімен, кондиционерлермен жабдықталған. Бір автобустың сыйымдылығы – 51 адам», – деді Жезқазған қаласының тұрғын үй-коммуналдық шаруашылық және автомобиль жолдары бөлімі басшысының орынбасары Аслан Арынов. Жезқазғанда барлығы 13 маршрут бар. 9 қалалық және 4 қала маңы. Болашақта қалада ONAY электронды жолақы төлеу жүйесін іске қосу да жоспарда бар. Барлық жаңа автобустар сандық жүйелермен және GPS-құрылғылармен жабдықталған. Бұл City-Bus мобильді қосымшасын әзірлеуге және қолданысқа енгізуге мүмкіндік береді, ол арқылы тұрғындар қоғамдық көліктің қозғалысы туралы ақпарат ала алады, дейді мамандар.