СҚО-да жаңа үйлердің сапасы сын көтермейді

Он шақты күн бұрын өңірге  Жамбыл облысынан арнайы келген мына мамандар қазір үйлердің едендерін бұзып жатыр, деп хабарлайды «Хабар 24».

Себебі жаңа баспаналарға кірген ағайын жағдай уәде еткендей болмай шықты дейді.

Ескелді Әбдірахман, қандас:

– Пеш сөнсе, үй бірден мұздайды. Салқын болады. Қазір мына полдарын ашып, фундаментке құм толтырып жатыр ғой. Астынан жел улейді ғой. Қазір мына бос, адам тұрмайтын үйлерді бітіріп, одан кейін біздерге келеді. 

Сергеевка қаласының мына ауданында осыдан екі жыл бұрын шамамен 50 шақты үй тұрғызылған болатын. Қазіргі таңда олардың жартысына жуығында халық тұрады. Жаңа деген тек аты ғана. Баспаналардың сапасы сын көтермейді. Сондықтан жергілікті билік бюджеттен қосымша ақша шығарып, оларды қайта жөндеп жатыр.

Баспаналардың көбінің пеші дұрыс салынбағандықтан, от жаққанда, үй іші көк түтін болады. Жаңбыр жауса, төбеден су сорғалайды. Қыста суық дейді тұрғындар.

Шал ақын ауданына былтыр Ираннан 12 отбасы қоныс аударған болатын. Жанға жайлы жағдай жасалмаған соң жартысына жуығы қайта көшіп кеткен.

Несіп Қазақ, қандас:

– Қалай тұрайық? Сапасы жақсы емес. Жұмыс болса. Дым жоқ. Әкімге бардым, әкім жоқ дейді. Арман мырза – әкімнің орынбасары, соған бардым. Шаруам жоқ сіздермен, сөйлеспеймін, кете бетіңдер деді. Құдай қаласа, біздер де кетеміз. Отырмаймыз.

45 үйдің еденін жөндеуге қазынадан тағы 13 млн теңгеден астам қаржы бөлінді. Дегенмен кезінде комиссия бұл баспаналарды қалай қабылдаған? Неге бұрынғы мердігер кемшілікті өз қаражатына жөндемейтіні түсініксіз.  

Саят Омаров, Шал ақын ауданы әкімінің орынбасары:

– Қостанайлық кәсіпкер аталған үйлерді 2019 жылғы техникалық талаптарға сай етіп тұрғызды. Тұрғындардың шағымдары бойынша біз бұл мәселені өзіміз шешуді жөн санадық. Дегенмен үйлер әлі кепілдікте. Сондықтан мамыр айында мердігер келіп, қалған шаруларды атқаратын болады.  

Жалпы былтыр оңтүстік өңірлерден көшіп келушілерге арнап салынған үйлердің сапасын қадағаламаған екі ауданның әкімін Президент қызметінен босатқан еді. Бірақ бұл жергілікті шенділерге әлі сабақ болмай тұр.

Авторлары: Самат Қайырденұлы, Төлеген Иманов