«Қазақстан халқына» қоры қамқоршылық кеңесінің төрағасы ауысты

Юрий Пя «Қазақстан халқына» қорының қамқоршылық кеңесінің төрағалығынан бас тартты, деп хабарлайды «Хабар 24» қордың сайтына сілтеме жасай отырып.

«Қордың қамқоршылық кеңесінің төрағасы Пя Юрий Владимирович Қамқоршылық кеңестің жұмыс көлемінің жоғары болуына байланысты төрағаның өкілеттігін мерзімінен бұрын тоқтату туралы өтініш білдірді. Ол «University Medical Center»  корпоративтік қорын басқарады.

Юрий Владимирович – Қазақстан Еңбек Ері, ең күрделі, жоғары технологиялық кардиохирургиялық операцияларды өз жетекшілігімен жүзеге асырып жүрген әлемге әйгілі кардиохирург. Бұл қызмет күн сайынғы тынымсыз еңбекті және жоғары талаптарға сай тәжірибені талап етеді. Юрий Владимирович көп уақытын білікті мамандарды даярлау мақсатына бағыттайды», – делінген мәліметте.

Юрий Владимирович қордың институционалдық қалыптасуының бастапқы кезеңіндеоның стратегиялық бағыттарын айқындауда елеулі үлес қосқаны да айтылған.

«Қамқоршылық кеңес құрамында қала отырып, Юрий Владимирович стратегиялық мақсаттар мен міндеттерді жүзеге асыруда қорға қолдау көрсетуді жалғастырады», – деп жазады қордың сайты.

Ал қордың қамқоршылық кеңесінің төрағасы болып қоғам қайраткері, «Атамекен» ҰКП Кәсіпкерлер құқығын қорғау және сыбайлас жемқорлыққа қарсы іс-қимыл жөніндегі кеңестің төрағасы Қайырбек Шошанұлы Сүлейменов сайланды.

Қамқоршылық кеңес төрағасының орынбасары болып дәрігер медицина ғылымдарының кандидаты, Қазақстан денсаулық сақтау ісінің үздігі Аманжолова Зәуреш Жұманәліқызы сайланды.