Елдің 8 өңірінде жол құрылысы басталды

Күн жылынғаннан кейін еліміздің 8 өңірінде жол құрылысы басталды, деп хабарлайды «Хабар 24».

Қазірдің өзінде мамандар орташа және күрделі жөндеу жұмыстарына кірісіп кетті. Ал құрылысы ұзаққа созылған  Атырау-Астрахан, Қарағанды-Балқаш, Меркі-Бұрылбайтал, Күрті-Бұрылбайтал және Талдықорған-Өскемен бағытындағы тасжолдар қайта жаңартылады. Жөндеу жұмыстарына 8 мың арнайы техника мен 12 мың маман жұмылдырылған.

Ләззат Стамғазиева, «ҚазАвтоЖол» ұлттық компаниясының ресми өкілі:

- Жалпы, елімізде 3,6 яғни 3600 шақырым жол реконструкция жұмыстарымен қамтылған. Ал 3400 шақырым жол орташа және күрделі жөндеу жұмыстарымен қамтылады. Биылға ең басты көздеп отырған мәселе – асфальты жоқ жерлерге асфальт төсеп, жүрісті қамтамасыз ету. Ал содан кейін қалған жұмыстар жасалады, яғни қалыпқа келтіру, шамдарды орнату, жолтаңбасын сызу деген сияқты қалған жұмыстар.