Қызылордада әдеби автобус жолға шықты
Қазақ тіліндегі ең алғашқы кітап 1807 жылы жарық көрген екен. Сейфул-Мәлік қисса дастаны Қазан қаласында басылып шыққан. Әдеби автобусқа мінген қызылордалықтар қазақ руханиятына қатысты біраз құнды мағлұматқа қанықты, деп хабарлайды «Хабар 24».
Жолаушылар жол-жөнекей поэзиялық жыр тыңдап, жас өнерпаздардың орындауындағы есті әндерді қосыла шырқады. Автобустағы жолаушыларға викториналық сұрақтар қойылып, Сыр өңірінен шыққан ақын-жазушылардың шығармалары таныстырылды. Ерекше шараны ауылдық кітапхана қызметкерлері Дүниежүзілік кітап және автор құқығын қорғау күніне арнайы ұйымдастырған. Акция бірнеше күнге жалғасады.
Гүлзат Тілесова, кітапханашы:
- Интернет желісінің өте кең тарауына байланысты ақпараттық бағдарламаларды көшіріп алу біздің кітап оқудан алшақтатып бара жатыр. Сол кітапқа деген құштарлықты арттыру мақсатында осы шараны ұйымдастырып жатырмыз.
Жолаушылар:
- Концерт беріп, балалар тақпақ айтып жатыр. Соны ұйымдастырған ұжымға рақмет, алғысым шексіз.
- Бүгін қоғамдық көлікке міндік, ішінде оқушылар ән айтып, түрлі сұрақтар қойып жатыр. Қуанып қалдық. Кітапханашылар көп мағлұмат беріп жатыр. Айт құтты болсын!