Қызылордада көлік қағып кеткен бес айлық сәби қаза тауып, анасы ауыр хәлде жатыр. Қайғылы оқиғадан кейін оқиға орнынан ізін жасырған жүргізуші әлі іздестіріліп жатыр, деп хабарлайды «24KZ».
Жол-көлік оқиғасы 13 қазан күні сағат 17:10 шамасында болып, Mitsubishi Lancer көлігі арбамен келе жатқан әйел мен сәбиді қағып кеткен. Зардап шеккендер ауруханаға жеткізілгенімен, бес айлық ұл бала алған жарақаттарынан көз жұмды. Ал 26 жастағы анасы әлі есіне келген жоқ, жағдайы өте ауыр. Туыстарының айтуынша, оның қабырғасы мен жамбасы сынған, алда бірнеше күрделі ота жасау қажет.
Қызылорда облыстық Полиция департаменті адам өліміне әкеп соққан жол апаты және оқиға орнын тастап кету деректері бойынша қылмыстық іс қозғалғанын хабарлады.
Күдіктінің жеке басы анықталды. Оның орналасқан жерін анықтап, ұстау үшін барлық қажетті шаралар қабылданып жатыр. Қызылорда қаласының шығаберістерінде бақылау күшейтілді, – деді ведомство өкілдері.
Апат болғанына үш тәулікке жуық уақыт өтсе де, іздестіру жұмыстары әлі де жалғасуда. Ал зардап шеккендердің туыстары күдіктінің елден қашып кетуі мүмкін деп қауіптенеді.
