420,29 511.30 5.69
+7 (7172) 757 485 24kz@khabar.kz
ҚАЗ

Елордада өрттен 13 көлік жанып кетті

  • 110
  • UPD: 13:28, 07.01.2021
Елордада өрттен 13 көлік жанып кетті фото: tengrinews.kz

Нұр-Сұлтанда 13 көлік өртеніп кетті.

Бұл туралы Төтенше жағдай департаментінің баспасөз қызметі хабарлайды.

Оқиға бүгін, 7 қаңтарда сағат 08:52-де Нұр-Сұлтан қаласы Есенберлин көшесіндегі көлік жуу орталығында болған. Көліктер өртеніп жатқаны туралы келіп түскен шақыруға Нұр-Сұлтан қаласының ТЖД Өрт сөндіру бөлімшелерінен 9 бірлік техника мен жеке құрамнан 15 адам шыққан.

Өртсөндірушілер сағат 08:59-да келіп, "Батыр" көлік жуу орнының екі қабатты ғимаратында көліктер жанып жатқанын анықтады.

Алдын ала болжам бойынша, 13 жеңіл автокөлік зардап шекті.

«Көлік жуу орнында автокөлік көп болғандықтан өртті сөндіру біраз қиынға соқты, бірақ өртсөндірушілердің жедел және сауатты іс-қимылдарының арқасында өрт 10 сағат 21 минут ішінде ауыздықталып, 10 сағат 53 минут ішінде толық сөндірілді. Қаза болғандар мен зардап шеккендер жоқ. Өрттің шығу себебі анықталып жатыр», - деді ТЖД баспасөз қызметінің өкілдері.

Нұр-Сұлтан қаласы ТЖД азаматтарға, ТҚС және басқа да кәсіпорындардың иелеріне қарапайым өрт қауіпсіздігі ережелерін сақтауға, тұрмыстық техниканы, элетроприборларды пайдалану жөніндегі нұсқаулықты сақтауға, электр сымдарының оқшаулағышы зақымдалған аспаптарды пайдаланбауға сенімді түрде кеңес берді.

Хабар 24 телеарнасы