Конституцияны түсіндіру жоспары бекітілді
Мемлекет басшысының тапсырмасымен Үкімет Конституцияны түсіндіру жөніндегі іс-шаралар жоспарын бекітті. Құжат қоғамда құқықтық мәдениетті арттыруға және негізгі заңның жаңа нормаларын кеңінен насихаттауға бағытталған.
Қазір сарапшылар мен қоғам қайраткерлерінің қатысуымен Конституцияның барлық новеллалары бойынша ақпараттық-түсіндірме жұмыстары жүргізіліп жатыр. Конституцияның жаңа қағидаттары білім беру жүйесіне кезең-кезеңімен енгізіледі. Премьер-министр қолданыстағы заңнаманы жаңа Конституция нормаларына сәйкестендіру бойынша кешенді талдау жүргізуді міндеттеді.
Олжас Бектенов, ҚР Премьер-Министрі:
- Мәдениет және ақпарат министрлігі уәкілетті мемлекеттік органдармен және ұйымдармен бірлесіп, осы бағытта жоспарлы жұмысты одан әрі жалғастыруы қажет. Оқу-ағарту, Ғылым және жоғары білім министрліктері халықтың құқықтық сауаттылығын қалыптастыру жөніндегі кешенді бағдарламаны уақтылы әзірлеп, Конституцияның тың қағидаттарын мектептер мен колледждердің және университеттердің үлгілік оқу бағдарламаларына енгізуді қамтамасыз етуге тиіс.