Жәнібек Әлімханұлы WBO нұсқасы бойынша суперорта салмақтағы бос тұрған әлем чемпионы атағы үшін даниялық Якоб Банкпен жұдырықтасады. Дүниежүзілік бокс ұйымы екі боксшының чемпиондық жекпе-жегін өткізу жөнінде келіссөз бастауға шешім қабылдады, деп хабарлайды 24KZ.
Бұған дейін қазақстандық боксшы чемпиондық белбеу үшін британдық Хамза Ширазбен кездесуі керек болған. Алайда Шираз жекпе-жектен бас тартып, WBO титулын босатты. Осыдан кейін ұйым бос қалған белбеу үшін Жәнібек Әлімханұлы мен Якоб Банк арасындағы кездесуді белгіледі.
Тараптарға келіссөз жүргізіп, жекпе-жек шарттарын келісуге 15 күн берілді. Келісім 2026 жылғы 7 қазан, сағат 16:00-ге дейін жасалуы керек. Егер осы уақытқа дейін ортақ мәмілеге келе алмаса, жекпе-жек өткізу құқығы промоутерлік саудаға шығарылады.
WBO ережесіне сәйкес, суперорта салмақтағы чемпиондық жекпе-жек үшін саудадағы ең төменгі ұсыныс сомасы 300 мың доллар болып белгіленген.
25 жастағы Якоб Банк кәсіпқой бокста жеңіліп көрмеген. Ол 20 жекпе-жек өткізіп, барлығында жеңіске жеткен. Оның 11 кездесуін нокаутпен аяқтаған. Даниялық боксшының WBO Global титулы да бар. Биыл ол бұрынғы әлем чемпионы Уильям Скуллды 12-раундта нокаутпен жеңген.
