loader

Қазақстандық теннисшілер Майами WTA 1000 турнирін аяқтады ҚТФ

Қазақстандық теннисшілер Майами WTA 1000 турнирін аяқтады

Қазақстандық теннисшілер Майами WTA 1000 турнирін үшінші айналымнан аяқтады.

Теннисшілеріміздің арасынан кортқа соңғы болып шыққан әлемнің 47-ракеткасы Юлия Путинцева жарыстың төртінші айналымына шыға алмады.

ҚТФ баспасөз қызметінің мәліметінше, Юлия үшінші айналымда әлемнің 6-ракеткасы испаниялық Паула Бадосамен шеберлік байқасты. Бірінші партияда испаниялық теннисші қос брейкке қол жеткізді – 6:3. Екінші сетті қазақстандық спортшы брейкпен бастағанымен, Бадоса сол бойда таразы басын теңестірді – 1:1. Үшінші геймде Путинцева үш бірдей брейк-пойнтты пайдалана алмаса, қарсыласы мұндай мүмкіндікті мүлт жіберген жоқ – 3:1. Ақыры Бадоса тағы бір брейкпен матчты тәмамдады – 6:2.

Қазақстанның бірінші, әлемнің 18-ракеткасы Елена Рыбакинаның жолын әлемнің 21-ракеткасы америкалық Джессика Пегула кесті. Бірінші партияда америкалық теннисші 4:0 есебімен алға кетті. Бұдан кейін Елена бір брейк жасағанымен, одан әріге шамасы жетпеді – 3:6. Пегула екінші сетті де брейкпен бастады – 2:0. Ақыры 6:4 есебімен жеңді.

Ал Қазақстанның бірінші, әлемнің 33-ракеткасы Александр Бублик Майами ATP Masters 1000 турнирінің үшінші айналымында әлемнің 8-ракеткасы, норвегиялық Каспер Руудпен күш сынасты. Биыл 5 наурызда А.Бублик Ослода Норвегияның бірінші ракеткасын 6:4, 5:7, 6:4 есебімен ұтып, Дэвис кубогының іріктеу ойынында Қазақстан құрамасына жеңіс әперген болатын. Бұл жолы матч басқаша өрбіді. Бірінші сетте есеп 4:3 болған мезетте К.Рууд брейк жасап, сосын өз геймін де ала білді – 6:3. Екінші партияда норвегиялық теннисші 4:0 есебімен алға кетті. Содан кейін өз мүмкіндігін жіберген жоқ – 6:2. Бір сағатқа созылған бәсеке барысында А.Бублик 5 эйспен ғана көзге түсті. Қарсыласы 3 эйспен бірге 7 брейк-пойнттың үшеуін пайдалана алды.

Сондай-ақ...