Ресейдің Менделеев университетінің Тараздағы филиалы толық жұмысқа кірісті

126 жылдық тарихы бар Ресейдің Менделеев университетінің Тараздағы филиалы толық жұмысқа кірісті.

Жоғары оқу орны, химия саласының мамандарын даярлайды. Оқу ордасын бітіргендер, қос диплом алады. Әрі бірден жұмысқа орналасуға мүмкіндік жасалған. 

Химия-технологиялық университетінің филиалы қыркүйекте өңірлік Тараз мемлекеттік университетінің базасында ашылды. Мұнда елде теңдессіз 4 зертхана, компьютерлік сыныптар мен оқу кабинеттері бар. Студенттер теориямен қатар өндірісті меңгеріп, дайын маман боп шығады. 

Камила Бөлекбаева, Менделеев атындағы РХТУ филиалы директорының м.а.:

- Студенттер мемлекет тарапынан грант иегерлері болып табылады. Яғни бұлардың екі степендия алуға мүмкіндіктері бар. Өйткені Казфосфат біздің индустриялдық серіктесіміз бұларға қосымша шәкіртақы төлеп отыр. Жобаның бір ерекшелігі студенттердің Ресейде Мәскеу қаласындағы басты университетте білім алып келуге мүмкіндік болуы.

Былтыр филиал 26 талапкерді қабылдады. Оқу ордасының білім беру жүйесі Менделеев университетінің тәжірибесіне негізделген. Яғни оқытушы құрамының 70 проценті мәскеуліктер болса, қалғаны өңірлік университеттің химиктері. 

Мұрат Дәуренбек, Тараз өңірлік университеті химия кафедрасының оқытушысы:

- Ресей университетімен және біздің университеттің мұғалімдері сабақ бергеннен кейін студенттердің ғылыми дәрежесі өте жоғары болады. Екі мемлекеттің ғылыми және білім бағдарламасы бір-бірімен сәйкес жүргізілсе студенттерге бітіргеннен кейін мүмкіншіліктерін береді, өмірінде де жұмыстарында да.

Жоғары оқу орнын бітіргендер жұмыс іздеп сабылып жүрмейді. Индустриалды серіктес атанған «Қазфосфат» компаниясы 5 жылға жұмыс ұсынып отыр. Сонымен қоса университет түлектеріне Менделеев және Тараз өңірлік университетінің дипломдары беріледі. 

Ақнұр Үшкемпір, студент:

- Қазақстандағы сұранысқа ие жұмыстардың бірі яғни мамандықтың бір ол - химик инженер. Сол үшін осы пәнді таңдадым. Және мен осы оқуды бітіріп, Қазақстандағы зауыттарды одан әрі көркейтіп Қазақстанды да одан әрі көркейткім келеді. 

Менделеев университетінің филиалы келер оқу жылында тағы 2 мамандық ашпақ. Жоспар бойынша 50 студентті грантқа қабылдап, тағы 3 зертхана ашу бар.

Мерей Бает, Тимур Сейілхан, Елдар Байділдә