Қазақстанда 81 жаңа бастапқы психикалық денсаулық орталығы және аутизмі бар балаларға арналған 189 күндізгі оңалту бөлімшелері ашылады. Бұл туралы Денсаулық сақтау министрі Ақмарал Әлназарова төрағалық еткен кеңесте айтылды, деп хабарлайды «24KZ».
Қазақстанда психикалық денсаулық саласындағы көмек көрсету желісін кеңейтіп, әсіресе ауыл тұрғындары мен балаларға жағдай жасау мақсатында ауқымды өзгерістер жоспарланып отыр. Жаңа Кешенді жоспар аясында елімізде 81 бастапқы психикалық денсаулық орталығы мен аутизмі бар балаларға арналған 189 күндізгі бөлімшесін ашу көзделіп отыр.
Бүгінде психикалық денсаулық мәселелері ерекше маңызға ие. Біздің міндетіміз – пациенттің тұрғылықты жеріне қарамастан, еліміздің барлық өңірінде мамандандырылған көмектің қолжетімділігін қамтамасыз ету, – деп мәселенің маңыздылығын атап өтті Дансаулық сақтау министрі Ақмарал Әлназарова.
Қазіргі уақытта республикада 20 психикалық денсаулық орталығы, 101 бастапқы орталық және 212 бейінді кабинет жұмыс істеп тұр. Дегенмен талдау нәтижесі көрсеткендей, 12 өңірде қосымша 81 бастапқы орталық ашу қажеттілігі бар. Бұл бастамалар ерте диагностикалау, емдеу және оңалту қызметтерін халыққа, әсіресе шалғай аудандар мен ауыл тұрғындарына жақындата түспек.
Бұдан бөлек, аутизм спектрінің бұзылыстары бар балаларға ерекше көңіл бөлінуде. Осы мақсатта психикалық денсаулық орталықтары мен аудандық ауруханалар базасында 189 күндізгі оңалту бөлімшелерін ашу көзделген. Бұл балаларды тәулік бойы стационарға жатқызбай-ақ сапалы оңалтудан өткізу мүмкіндіктерін едәуір кеңейтеді.
Саланың кадрлық әлеуетін нығайту мәселесі де назардан тыс қалған жоқ. Министр балалар мен ересектердің психиатриясы бағыттарында мамандармен қамтамасыз етуді күшейтіп, әлеуметтік қолдаудың қосымша шараларын қарастыруды тапсырды.
Кадр тапшылығы әлі де негізгі мәселелердің бірі болып отыр. Мамандар даярлауды кеңейту, оның ішінде жергілікті атқарушы органдардың білім беру гранттары есебінен оқыту көлемін арттыру және медицина қызметкерлерін әлеуметтік қолдаудың қосымша шараларын қарастыру қажет, – деді.
Жаңа Кешенді жоспар жобасы тек орталықтар ашумен шектелмей, медициналық ұйымдарды жаңғыртуды, заманауи жабдықтармен қамтуды, амбулаториялық көмекті дамытуды және дәрі-дәрмекпен қамтамасыз ету жүйесін жетілдіруді де қамтиды. Психикалық денсаулық саласында бұзылыстарды ерте анықтаудан бастап толыққанды емдеу, оңалту және әлеуметтік қолдауға дейінгі үздіксіз жүйені қалыптастыру алдағы уақытта да басты басымдық болып қала бермек.
