Павлодар облысында жылына 75 мың тонна макулатура өңдейтін зауыт іске қосылады

Павлодар облысында «QazRoyalPak» ЖШС-нің макулатураны өңдеу жобасы жүзеге асырылып жатыр. Кәсіпорын жобалық қуатына шыққаннан кейін жылына 75 мың тоннаға дейін қағаз қалдығын өңдей алады, деп хабарлайды 24KZ ҚР Экология және табиғи ресурстар министрлігіне сілтеме жасап.

Жобаның құны шамамен 10,8 млрд теңге. Жоба «Жасыл даму» АҚ бағыттаған кәдеге жарату төлемі қаражаты есебінен қаржыландырылған. Қаражат толық көлемде игерілді.

Қазіргі уақытта жоба белгіленген кестеге сәйкес жүзеге асырылып жатыр. Өндірістік цехтардың құрылысы аяқталуға жақын. Сонымен қатар жабдықтарға арналған іргетастарды орнату жұмыстары жүргізілуде. Нысанды 2028 жылы пайдалануға беру жоспарланған.

«QazRoyalPak» ЖШС директоры Гүлнара Қайдарованың айтуынша, жоба кәсіпорынның өндірістік мүмкіндіктерін едәуір кеңейтуге мүмкіндік береді.

 Бұл жоба біз үшін өндірісті дамытудағы маңызды кезең. Қуаттылықты арттыру макулатураның едәуір көлемін өңдеуге және қайталама шикізатты өндірістік циклде тиімді пайдалануға мүмкіндік береді, — деді Гүлнара Қайдарова.

Жобаны іске асыру Павлодар облысында макулатураны өңдеуге арналған қосымша қуаттар құрып, қағаз қалдықтарын қайталама айналымға тарту көлемін арттыруға мүмкіндік береді.

ҚР Экология және табиғи ресурстар министрлігінің мәліметінше, «Жасыл даму» АҚ кәдеге жарату төлемі есебінен жалпы сомасы шамамен 116 млрд теңгеге 30 жобаны қаржыландырған.

Мұндай жобаларды жүзеге асыру қалдықтарды басқарудың заманауи инфрақұрылымын дамытуға, қайта өңдеу көлемін арттыруға, қалдықтарды көму көлемін азайтуға және қайталама шикізатты Қазақстан Республикасының Экология кодексіне сәйкес экономикалық айналымға тартуға ықпал етеді.