Семейлік студенттер оқытушыларына көмекші робот жасап берді
Жүйе оқу үдерісін ұйымдастыруға көмектесіп, сұрақтарға жедел жауап береді. Жастар ІТ-технологиялар саласындағы жобаларын арнайы көрмеде таныстырды.
Студенттер бұл роботты «Білгіш» деп атайды. Ол дәстүрлі тәлімгерлікті заманауи технологиямен үйлестіріп, студенттерге «цифрлық ұстаз» ретінде қызмет етеді. Жаңа материалды игеруді жеңілдетеді.
Илья Пимонов, студент:
- Бұл жоба толығымен біздің колледжде жасалған. Жасанды интеллект біздің серверлерде жұмыс істейді. Сондықтан оның жылдамдығы мен қуаты өзімізге байланысты.
Жобаның тағы бір маңызды тұсы оның практикалық бағытта жүзеге асуы. Студенттер бағдарламалау, робототехника және жасанды интеллект салаларында бай тәжірибе жинақтады.
Айдын Қасымжанов, оқытушы:
- ChatGPT сияқты жылдам емес. Бірақ қажетті деңгейде өзіміздің қажеттілігімізге жетіп жатыр деп ойлаймын. Енді бара-бара бұның қуатылығын күшейтіп, яғни оны модернизациялап, оптимизациялап бір сөзбен айтқанда, колледжіміздің оқушыларына әлі жұмыс жетеді.
Сонымен қатар оқу орнында заманауи технологиямен жабдықталған ерекше смарт кабинет бар. Ол дауыспен басқару жүйесі арқылы жұмыс істейді. Яғни оқытушы мен студенттер құрылғыларды арнайы команда арқылы басқара алады. Бұл жаңашылдық білім беру үдерісін жеңілдетіп, цифрлық мүмкіндіктерді кеңінен пайдалануға жол ашып отыр.
Шәмшия Құмашева, IT және жаңа технологиялар жоғары колледжінің директоры:
- Бізде он шақты жобаларымыз бар, ол көбінесе жасанды интеллектпен байланысты. Өйткені біз келешекте осы бағыттағы мамандарды даярлап отырмыз. Мысалы, мынаны қараңдар, мынаны оқимыз дегеннен қарағанда, балаларды осы жобаға енгізіп, олар соны қолме істеп, оның нәтижесін көріп үйренгені дұрыс деп ойлаймын.
Көрме барысында студенттер өздері әзірлеген заманауи жобаларды таныстырды. Олардың арасында ақылды дрондар, тапсырмаларды орындайтын роботтар және жасанды интеллектке негізделген бағдарламалар бар. Бұл жобалар жастардың шығармашылық ой-өрісін және техникалық қабілетін көрсетеді.
Рүстем Қайратұлы, Мәди Базарбеков