«Ер азаматтың әлсіз болуға хақы жоқ»: Халық қаһарманы жастарды жігерлі болуға шақырды

7 мамыр – Отан қорғаушылар күні қарсаңында Халық Қаһарманы Бақытжан Ертаев еліміздің қорғаныс қабілеті мен бүгінгі жауынгерлік рух туралы ой бөлісті. Аңыз адамның пайымынша, әскери қызмет – бұл тек міндет емес, бұл – ұлттық намыс пен ер азаматтық болмыстың таразысы. Бұл туралы ол «24KZ» тілшісіне берген сұхбатында айтты.

Бақытжан Ертайұлы сөзін кешегі мен бүгінгінің сабақтастығынан бастады. Оның айтуынша, ертеректе әскери киім кию – әрбір бозбаланың ең биік арманы болатын.

«Біздің заманымызда әскерге бармау – үлкен ұят, тіпті азаматтық кемшілік болып саналатын. Ауыл-аймақ болып әскерге шығарып салып, абыроймен оралғандарды бүкіл ел болып төбесіне көтеретін. Өйткені әскерден келген жігіт – өмірдің ащы-тұщысын татқан, жауапкершілікті сезінген нағыз батыр санатында еді», – дейді ол.

Бүгінде әскери қызметтен жалтару мәселесіне тоқталған қаһарман жігіттің намысын қайрауды басты мақсат деп біледі. Оның ойынша, бейбіт күннің аспаны ашық болғанымен, кез келген мемлекеттің ішкі тұтастығы оның қорғаныс қабілетімен өлшенеді.

«Біз – батырлардың қаны тамған, ерлердің ізі қалған Ұлы даланың иесіміз. Сондықтан біздің ер азаматтардың әлсіз болуға, жігерсіздік танытуға ешқандай моральдық хақы жоқ. Әскер – бұл тек қару ұстап, сап түзеу емес. Бұл – таң атқаннан күн батқанға дейін өз ерік-жігеріңмен күресу, тәртіпке бағыну және Отанды шын жүрекпен сүю. Бейбітшіліктің қадірін соғысты көргендер жақсы біледі. Біз осы тыныштықты сақтау үшін әрдайым сақадай сай болуымыз керек», – деп түйіндеді Бақытжан Ертаев.

Бүгінде Қазақстанның Қарулы Күштері тек әскери құрылым ғана емес, ел экономикасы мен ғылымының бір бөлшегіне айналған ауқымды сала. Генерал айтқан ұлағатты сөздердің астарында мемлекеттің мықты қорғаныс жүйесі жатыр.

Қазіргі таңда Қазақстанның Қарулы Күштері мен өзге де әскери құрылымдарында 70 мыңнан астам кәсіби әскери қызметші мен сарбаз қызмет етеді. Олардың қатарында құрлық әскерлері, әуе қорғанысы және әскери-теңіз күштерінің мамандары бар.

Жыл сайынғы шақыру науқаны аясында 35 мыңнан астам жас мерзімді әскери қызметке алынып, Отан алдындағы борышын өтейді.