Павлодар қаласында «азық-түлік» деген желеумен есірткі саудалаған күдіктіге қатысты сот үкімі шықты, деп хабарлайды «24KZ».
Сот Алекперов пен оның екі сыбайласына 7 жылдан бас бостандығынан айыру жазасын тағайындады.
ҚР Қаржылық мониторинг агенттігінің мәліметінше, З.Ф. Алекперовтің есірткі заттары қосылған көкнәр тұқымдарын азық-түлік өнімі ретінде көрсетіп, заңсыз өткізуді ұйымдастырғаны анықталған.
Қылмыстық схемаға күдіктінің жақын туыстары да қатысқан. Олардың арасында жеткізу, сақтау, буып-түю және өткізу міндеттері бөлінген.
Өнімдер басқа өңірден логистикалық компаниялар арқылы жеткізіліп отырған. Сату көкнәр тұқымы мен дәмдеуіштер ретінде жүзеге асырылған.
Тінту барысында есірткі заттары араластырылған көкнәр тұқымдарының буып-түйілген партиялары тәркіленді.
Қаражат қолма-қол ақша түрінде де, банк аударымдары арқылы да қабылданған.
Қылмыстық жолмен алынған табысқа ұйымдастырушы екі автокөлік сатып алып, оларды жасыру мақсатында үшінші тұлғалардың атына рәсімдеген.
Автокөліктер мемлекет кірісіне тәркіленді. Сондай-ақ құрамында есірткі заттары бар 321 келі көкнәр тұқымы жойылды.
«24KZ» Telegram-арнасына жазылыңыз