Еліміздің бірқатар өңірінде кәмелетке толмағандар арасындағы құқық бұзушылықтың алдын алу мақсатында кең ауқымды профилактикалық рейдтер өткізілді, деп хабарлайды «24KZ» polisia.kz сайтына сілтеме жасап.
Алматы, Шымкент қалаларында, сондай-ақ Алматы, Жамбыл, Маңғыстау, Павлодар, Солтүстік Қазақстан, Қызылорда, Абай және Ұлытау облыстарында өткен іс-шаралар 1–3 шілде аралығын қамтыды.
Шараға 3 мыңға жуық полиция қызметкері жұмылдырылды. Нәтижесінде 2400-ге жуық жасөспірім полицияға жеткізілген. Олардың ішінде 1500-і әкімшілік құқық бұзушылық жасағаны үшін, ал 1000-ға жуығы қараусыз және панасыз жүргені үшін анықталған.
Сонымен қатар рейд барысында 4 мыңға жуық әкімшілік құқық бұзушылық тіркелді. Оның ішінде балаларды тәрбиелеу жөніндегі міндеттерін орындамаған 257 ата-ана, сондай-ақ кәмелетке толмағандардың түнгі уақытта ойын-сауық орындары мен көшеде жүргені үшін 1500-ге жуық ата-ана жауапкершілікке тартылған.
Ресми мәліметке сәйкес, аталған іс-шаралар барысында кәмелетке толмағандар қатысқан қылмыстық құқық бұзушылықтар тіркелмеген.
Мамандар мұндай профилактикалық рейдтер алдағы уақытта да тұрақты түрде жалғасатынын атап өтті.
«24KZ» Telegram-арнасына жазылыңыз