Қазақстанда жылжымайтын мүлікке қатысты келісімшарттарды рәсімдеу тәртібі өзгерді. 2026 жылғы 8 қыркүйектен бастап пәтерді немесе үйді сатып алу, сыйға тарту, айырбастау және кепілге қою сияқты рәсімдер тек мүлік орналасқан аймақтағы нотариуста жүзеге асырылады, деп хабарлайды «24KZ».
Бұл өзгеріс құжат айналымын ретке келтіріп, сатылымның ашықтығын арттыру және алаяқтық әрекеттердің алдын алу мақсатында қабылданды. Жаңа талап тек жылжымайтын мүлікке ғана қатысты, ал мұрагерлік немесе өзге де нотариаттық әрекеттер бұрынғы тәртіппен жүре береді.
Басқа қалада жүргендер бұл жағдайды қалай шешеді?
Аумақтық қағидат азаматтардың құқығын шектемейді. Егер пәтеріңіз басқа қалада болып, өзіңіз басқа өңірде жүрсеңіз, уайымдаудың қажеті жоқ. Бұл жағдайда өз атыңыздан әрекет ету үшін сенімді өкіліңізге (туысыңызға немесе танысыңызға) сенімхат рәсімдеуге болады.
Әдеттегідей:
Меншік иесі өз қаласында сенімхат жаздырады;
Сенімхат алған өкіл мүлік орналасқан қалаға барып, сол жердегі нотариус арқылы келісімшарт рәсімдейді.
Өзгеретіні - тек құжатқа қол қойып, куәландыратын нотариустың орналасқан жері. Енді мүлік қай өңірде тіркелген болса, келісім де сол жерде жасалуы тиіс.
