Қазақстанда әр омартаға ветеринариялық паспорт рәсімдеу міндеттеледі
Қазақстанда әр омартаға ветеринариялық паспорт рәсімдеу міндеттеледі. Жаңа талап 2026 жылғы 5 қазаннан бастап күшіне енеді, деп хабарлайды 24KZ.
Тиісті ережені Ауыл шаруашылығы министрлігі бекітті. Құжат 2026 жылғы 21 қыркүйектегі №343 бұйрықпен қабылданған. Ветеринариялық паспорт омарта шаруашылықтарын ветеринариялық есепке алу жүйесіне енгізуге мүмкіндік береді.
Паспортты мемлекеттік ветеринариялық ұйымның маманы рәсімдейді. Ол үшін омарта иесі өтініш беруі қажет.
Өтініш қаралғаннан кейін 10 жұмыс күні ішінде мамандар омартаны тексереді. Тексеру нәтижесі бойынша ветеринариялық паспорт рәсімделіп, ветеринариялық ұйымның арнайы журналына тіркеледі.
Құжатта омартаның ветеринариялық жағдайы туралы негізгі мәліметтер көрсетіледі. Атап айтқанда, омарта иесінің деректері, ара ұяларының саны, жүргізілген ветеринариялық өңдеу жұмыстары және эпизоотиялық жағдай туралы ақпарат енгізіледі.
Ветеринариялық паспорттың нөмірі омартаның есептік нөміріне сәйкес келеді. Бұл нөмір ветеринариялық бақылау мен есеп жүргізу кезінде бірыңғай сәйкестендіргіш ретінде пайдаланылады.
Осылайша, 5 қазаннан бастап омарта иелері нысанды белгіленген тәртіппен тексертіп, ветеринариялық паспорт рәсімдеуі керек. Жаңа талап омарталарды ветеринариялық есепке алуды жүйелеуге және ара тұқымдастарының жағдайын бақылауды күшейтуге бағытталған.
