Қазақстан электронды үкіметті дамыту бойынша БҰҰ-ның әлемдік рейтингінде 2018 жылғы 39-орыннан 2024 жылы 24-орынға көтерілді. Ал онлайн мемлекеттік қызметтердің қолжетімділігі бойынша әлемнің үздік он елі қатарына енді, деп хабарлайды «24KZ».
БҰҰ-ның электронды үкіметті дамыту жөніндегі 2024 жылғы есебіне сәйкес, Қазақстан 193 мемлекеттің арасында 24-орынға ие болды. Бұл көрсеткіш елдегі цифрлық мемлекеттік қызметтердің, телекоммуникациялық инфрақұрылымның және цифрлық басқару жүйесінің даму деңгейін көрсетеді.
Соңғы жеті жылда мемлекеттік қызметтерді цифрландыру жекелеген анықтамалар мен өтініштерді электронды форматқа көшірумен шектелмей, азаматтардың мемлекеттік органдармен өзара байланысын жеңілдетуге бағытталды. Енді көптеген қызметті онлайн алуға, өтініштің мәртебесін бақылауға және қажетті құжаттарды электронды түрде рәсімдеуге болады.
Бұл өзгерістер азаматтардың мемлекеттік мекемелерге бару қажеттілігін азайтып, уақытын үнемдеуге мүмкіндік береді. Кәсіпкерлер үшін де электронды қызметтер әкімшілік рәсімдерді жеңілдетуге ықпал етеді.
Дегенмен цифрлық қызметтердің тиімділігі тек олардың санымен емес, қолжетімділігімен, рәсімдеу жылдамдығымен және пайдаланушыларға қаншалықты ыңғайлы екенімен де бағаланады.
Қазақстанның халықаралық рейтингтегі ілгерілеуі электронды үкіметті дамытудағы маңызды нәтижелердің бірі саналады. Алдағы кезеңде мемлекеттік қызметтерді өзара ықпалдастыру, деректерді қайта сұратуды азайту және азаматтардың сұранысына бейімделген цифрлық шешімдерді дамыту өзекті болып қала береді.
«24KZ» Telegram-арнасына жазылыңыз
