Қазақстанда Республика күні қарсаңында бүкіл елді қамтитын мерекелік жеңілдіктер науқаны басталды. Оған Republic Day және Bereke Fest акциялары кіреді. 17 қазаннан бері науқанға еліміз бойынша 649 сауда нысаны қосылды, деп хабарлайды 24KZ.
Republic Day акциясы ірі сауда-ойын-сауық орталықтары мен сауда кешендерінде өтсе, Bereke Fest науқанына сауда желілері қатысып жатыр.
Азық-түлік пен басқа тауарларға 50%-ға дейін жеңілдік
Сатып алушыларға азық-түлік және азық-түлікке жатпайтын тауарлар арнайы бағамен ұсынылады. Мерекелік жеңілдіктер 27 қазанды қоса алғанға дейін жалғасады. Кейбір тауар санаттарына 50%-ға дейін жеңілдік қарастырылған. Оның мөлшері тауар түріне және акцияға қатысатын сауда ұйымдарының шарттарына байланысты.
Republic Day: 232 сауда орталығы мен сауда үйі
Republic Day акциясы аясында 232 сауда-ойын-сауық орталығы мен сауда үйі жеңілдіктер ұсынып отыр. Олардың қатарында Астанадағы MEGA Silk Way және «Хан Шатыр», Алматыдағы MEGA Alma-Ata, MEGA Park және Forum Almaty, Шымкенттегі Mega Planet пен Shymkent Plaza бар.
Bereke Fest: сауда желілерінің 417 дүкені
Bereke Fest акциясына бөлшек сауда желілерінің 417 дүкені қосылды. Олардың арасында Magnum, SMALL, «Астықжан» және GraMad бар. Мерекелік ұсыныстар еліміздің басқа өңірлеріндегі сауда орындарында да қолжетімді.
Акциялар тұтынушылық сұранысты ынталандыруға және ішкі сауданы дамытуға бағытталған. Жеңілдікпен тауар сатып алу мүмкіндігімен қатар, науқан сауда орындарына келушілер санын арттырып, сатылым көлемін ұлғайтуға, ал отандық өндірушілерге өз өнімдерін сауда желілерінде кеңінен ұсынуға мүмкіндік береді.
Акцияға қатысатын сауда орындары мен жеңілдіктер туралы ақпарат
Жалпыреспубликалық науқанды Сауда және интеграция министрлігі жергілікті атқарушы органдармен бірлесіп ұйымдастырған. Акцияға қатысатын сауда орындарының мекенжайлары көрсетілген толық тізім әкімдіктердің ресми интернет-ресурстарында жарияланған.
Жеңілдіктердің мөлшері, тауарлар тізімі және сатып алу шарттары туралы ақпаратты сауда ұйымдарының өздері ұсынады.
Мерекелік акциялар 27 қазанда аяқталады.
