Қасым-Жомарт Тоқаев: Қазақстанда жеті миллионға жуық бала бар

Президент Жолдауында денсаулық сақтау инфрақұрылымын дамыту, ана мен балаға көрсетілетін медициналық көмектің сапасын арттыру мәселелеріне ерекше назар аударды. Осы бағытта елімізде жаңа перинаталды орталықтар мен балалар ауруханаларын салу жоспарланып отыр, деп хабарлайды «24KZ». Мемлекет басшысы: 

«Қазақстанда жеті миллионға жуық бала бар. Бұл – халқымыздың 34 пайызы. Жыл сайын 330 мыңнан астам сәби дүниеге келеді. 
Елімізде халық саны қарқынды өсуде. Сондықтан денсаулық сақтау инфрақұрылымын жүйелі әрі жедел дамыту – өте маңызды міндет. 
Біз ауқымды құрылыстың алғашқы кезеңінде еліміз бойынша сегіз заманауи перинаталды орталық салуды жоспарлап отырмыз. 
Бұдан басқа, Атырау, Ақтөбе, Алматы, Шымкент, Қаскелең, Семей, Ақтау қалаларында жеті көпбейінді балалар ауруханасы, Астанада тағы екі медициналық нысан бой көтереді. 
Аталған жұмысқа бюджет қаражатымен қатар, жеке капиталды кеңінен тартқан жөн. 
Қолға алынған мемлекет пен жекеменшік серіктестігі жобаларын сәтті жүзеге асыру қажет. Мұндай серіктестік түрі әлеуметтік инфрақұрылымға салынатын жеке инвестиция көлемін ұлғайтуға көмектеседі. 
Ең бастысы, тиісті рәсімдерді негізсіз созбай, шешімдерді тез қабылдау керек».