Қарағандыға қонған 5 ұшақ қайта жөнелтілді

Астана әуежайындағы жағдай тұрақталғандықтан, Қарағандыға қонған 5 ұшақ қайта жөнелтілді, деп хабарлайды 24KZ.

Олар – Дубай, Алматы, Өскемен, Семей және Ақтөбе бағыттары бойынша ұшатын әуе рейстері. Барлығында шамамен 400 жолаушы болған. Оқыс оқиғадан кейін жоспарлы рейстер Қарағанды әуежайына қондырылған. Жолаушылардың жағдайы жақсы. Барлығы елордаға жеткізіледі.

Думан Тоқабай, «Сарыарқа» әуежайының өндірістік диспетчерлік қызметінің бас диспетчері:

- Астана әуежайындағы жолақтардың бірінде кедергі туындауына байланысты «Сарыарқа» әуежайына шұғыл 5 борт қонған болатын. Олар – Qazaq Air, Air Astana және FlyArystan компанияларына қарасты ұшақтар. 4 ұшақ жолаушыларымен қайта жөнелтілді. Барлығына жанармай құйылды. Әуежайдағы жағдай тұрақты. Соңғы ұшақты жөнелтуге дайындық жүріп жатыр.