Өзбекстан Сенаты балаларға жыныстық зорлық жасағандарды өмір бойы соттауды мақұлдады
Өзбекстан Сенаты 14 жасқа толмаған балаларға қатысты зорлық-зомбылық үшін жазаны қатаңдатуды көздейтін заңды мақұлдады, деп хабарлайды «24KZ».
Құжат кәмелетке толмағандарға қатысты сексуалдық сипаттағы зорлық-зомбылық үшін жазаны айтарлықтай қатаңдатуды көздейді. Бұл бастама Наманган облысындағы балабақшалардың бірінде орын алған балаға қатысты зорлық-зомбылық туралы резонансты істен кейін көтерілді. Өзбекстан Президенті әкімшілігінің басшысы Саида Мирзиёева болған жайтты сұмдық деп атап, мұндай қылмыстар үшін, өзінің пікірінше, өлім жазасы қолданылуы керек екенін айтты.
Алайда Өзбекстанда өлім жазасына Конституциямен тыйым салынғандықтан, оны қайтару Ата заңды өзгертуді талап етер еді. Осыған байланысты өмір бойына бас бостандығынан айыру жазасы билік үшін конституциялық тыйымды өзгертпей-ақ, қылмыстық заңнама арқылы қатаң шара қолданудың неғұрлым оңтайлы жолы болды.
Басты өзгерістер:
14 жасқа толмаған балаларға қарсы сексуалдық сипаттағы аса ауыр қылмыстар үшін 25 жылға дейін бас бостандығынан айыру немесе өмір бойына түрмеге жабу жазасы енгізілді. Бұл қылмыстар бойынша ескіру мерзімі қолданылмайды, сондай-ақ баланың өліміне әкеп соққан қасақана қылмыстар үшін шартты түрде мерзімінен бұрын босатуға немесе жазаны шартты етуге тыйым салынады.
Зорлық-зомбылыққа ұшыраған кәмелетке толмағандарға мемлекет есебінен тегін заңгерлік көмек көрсетіледі. Жәбірленуші баланың жауап алу процесі міндетті түрде видеоға түсіріледі. Балаларға қатысты зорлық-зомбылық үшін жауапқа тартылған білім беру мекемелерінің қызметкерлері жұмыстан босатылып, кейін бұл салаға мүлде жолатпау шектеулері қойылады.
Бала тәрбиесіне салғырт қарағаны, қажетті жағдай жасамағаны және балаларды зиянды ақпараттан қорғамағаны үшін әкімшілік жауапкершілік күшейтіледі. Кәмелетке толмағандарды арнайы оқу-тәрбие мекемелеріне мәжбүрлеп жіберу тәжірибесі жойылып, оның орнына баламалы әлеуметтік шаралар қолданылмақ.
Құжат күшіне енуі үшін оған президент қол қоюы тиіс.
