АҚШ-та 30 жылдық тұрғын үй несиесінің орташа мөлшерлемесі 7,28%-ға жетіп, 2023 жылғы қарашаның соңынан бергі ең жоғары деңгейге көтерілді. Бұл соңғы төрт жылдан астам уақыттағы бір апта ішіндегі ең үлкен өсім, деп хабарлайды 24KZ The Hill басылымына сілтеме жасап.
Freddie Mac компаниясының 1 қазандағы дерегіне сәйкес, тұрғын үй несиесінің мөлшерлемесі бір аптада 7,03%-дан 7,28%-ға өскен. Қарыз алу құнының артуы америкалықтардың баспана сатып алуын қиындатып, кейбірін үй алу жоспарын кейінге қалдыруға мәжбүр етуі мүмкін.
Сарапшылар мөлшерлеменің өсуіне инфляцияның жоғары болуы, жанармай бағасының қымбаттауы және мемлекеттік облигациялар кірістілігінің артуы әсер етіп отырғанын айтады. АҚШ-тағы мемлекеттік борыштың өсуі де тұрғын үй несиесінің құнына қысым түсіреді.
АҚШ-тың Экономикалық талдау бюросының мәліметінше, жеке тұтыну шығындары бағасының индексімен өлшенетін жылдық инфляция ақпандағы 2,8%-дан тамызда 3,4%-ға дейін өскен. Ұлттық риелторлар қауымдастығының бас экономисі Лоуренс Юн мұны энергия көздерінің қымбаттауымен байланыстырады.
Тұрғын үй несиесінің құнына Федералдық резерв жүйесінің шешімдері ғана емес, инвесторлардың мемлекеттік борышқа қатысты алаңдаушылығы да әсер етеді. АҚШ-тың 10 жылдық қазынашылық облигацияларының кірістілігі ұзақ мерзімді тұрғын үй несиелерінің мөлшерлемесін айқындайтын негізгі көрсеткіштердің бірі саналады.
Қазір үйлердің сатылу мерзімі ұзарып, кейбір сатушылар бағаны төмендетуге мәжбүр. Сарапшылардың болжамынша, алдағы 12 айда тұрғын үй несиесінің мөлшерлемесі 6,5–8% аралығында болуы мүмкін.
Бұл жағдай қарашада өтетін АҚШ Конгресіне сайлау қарсаңында да маңызды мәселеге айналуы ықтимал. Тұрғын үйдің қолжетімділігі мен күнкөріс құны америкалық сайлаушылар үшін өзекті тақырыптардың бірі болып отыр.
