Елімізде мемлекеттік қолдауға және қаржыландыруға үміткер киножобаларды қараған Ведомствоаралық комиссияның қорытынды отырысы өтті, деп хабарлайды «24KZ».
Ұлттық кино өнерін дамытуды көздейтін бұл байқау ағымдағы жылдың 1 наурызында басталған болатын. Киножобаларды іріктеу бірнеше күрделі кезеңнен тұрды:
Электронды форматта барлығы 323 өтінім қабылданып, оның талапқа сай келген 277-сі Сараптама кеңесінің қарауына жолданды.
Іріктеу нәтижесінде 95 киножоба питчингке, яғни ашық қорғау кезеңіне жолдама алды. Сараптама кеңесі бұл туындыларды көркем, деректі және анимациялық фильмдер секциялары бойынша жіті тексерді.
Жобаларды ашық қорғау рәсімі Ұлттық киноны қолдау мемлекеттік орталығының ресми YouTube арнасында тікелей эфирде көрсетілді. Бұл трансляция конкурстың таза әрі ешқандай жең ұшынан жалғасусыз өтуін қамтамасыз етті.
Ұзаққа созылған талқылаулар мен қорғау жұмыстарының қорытындысы бойынша, «Ұлттық фильм» мәртебесін алуға лайықты деп танылған 34 киножоба оң баға алып, Ведомствоаралық комиссияның үстеліне қойылды.
Комиссия мүшелерінің соңғы дауыс беру нәтижесінде, биыл мемлекет тарапынан қаржылай қолдау көретін ең үздік 18 жоба іріктеп алынды. Жақын арада отандық кинематография қоржыны осы жеңімпаз атанған жаңа туындылармен толығатын болады.
