Түркістан облысындағы мектептерде ІІІ тоқсан дәстүрлі форматта жалғасады

Түркістан облысында бастауыш және мектеп бітіруші сыныптар 3-тоқсаннан бастап дәстүрлі форматта оқиды, деп хабарлайды «Хабар 24».

Демек, 9 бен 11-сынып және 1-ден 5 дейінгі бастауыш сынып оқушылары санитарлық талаптарды сақтай отырып, мектепке барып білім алады. Қалған сыныптардың барлығы үйде отырып, қашықтықтан оқытуды жалғастырады. Өңірдегі 9 бен 11-сынып оқитын 66 мыңнан астам оқушы негізгі пәндердің 70-ын штаттық режимде оқиды. Сондай-ақ мектеп әкімшілігінің шешімімен сабақтан тыс уақытта, үлгерімі төмен оқушылар үшін 5 адамнан аспайтын топтарда дайындық сабақтары өткізіледі.

Рақымбек Жолаев, облыстық адами әлеуетті дамыту басқармасының басшысы:

– 3-тоқсанда жоғарыда айтылғандарға қосымша оқу процесін штаттық режимде санитарлық эпидемиологиялық талаптарды қатаң сақтай отырып, ұйымдастыруға рұқсат берілді. Қазіргі таңда мектептер әр ауданның санитарлық бақылау басқармаларының рұқсаттамасын алуда. ҚР Үкіметінің резервінен 57 мың 199 компьютер сатып алынып, бүгінгі күні тапсырма 100% орындалды.