Елде табысын жасырғандарға айыппұл салынады

Табысын жасырғандарға айыппұл салынады. Қазір елде жалпыға бірдей декларацияның екінші кезеңі өтіп жатыр.

1 млн 700 мыңға жуық адам декларация тапсыру қажет. Бүгінге дейін 65 пайызы, табысын көрсеткен. Қаңтардан бастап мемлекеттік мекемелер мен квази-мемлекеттік сектор қызметкерлері, жеке табыс салығы мен мүлкі бойынша есеп беріп жатыр. Декларациялау 2021 жылы енгізілді. Азаматтар жылдық табысын, барлық кірістерін, ашық көрсетуге міндетті. Келер жылы жеке кәсіпкерлер, 2025 жылы өзге санаттағы азаматтар, декларация тапсыратын болады.

Айнұр Сартаева, ҚР ҚМ Мемлекеттік кірістер комитеті басқарма басшысының орынбасары:

- Егер азамат қандай да бір себептермен декларация тапсыру барысында бір мүлкін көрсетуді ұмытып кетсе, ол үш жыл ішінде аталған декларацияға қосымша декларация тапсыра алады. Бұл салық кодексіндлек көрсетілген. Егер азамат қандай да бір себептермен декларацияны тапсырмаса, бірінші рет заң бұзушылыққа орын берген жағдайда ескерту жасалады. Одан кейін қайталаса онда 15 АЕК айыппұл салынады.

Декларацияның қағаз нұсқасын тапсыратын болсаңыз 15-шілдеден кешіктірмеу қажет. Құжатты жергілікті мемлекеттік кірістер органдарына пошта арқылы жіберуге болады. Ал электронды түрдегі нұсқасын 15- қыркүйекке дейін көрсетіп үлгеру керек. Яғни, cabinet.salyk.kz, "электрондық үкімет" порталдарымен қатар, esalyq azamat мобильді қосымшасы арқылы табыс салығын көрсете аласыз.