Олимпиада чемпионын жерлестері күтіп алды. LIVE

Олимпиада чемпионы Елдос Сметовты туған жері той жасап күтіп жатыр.

Тараздың шығыс қақпасынан туған туыстары және жанкүйерлері қарсы алды.

Мерей Бает, тілші:

- Қазір Таразда той болып жатыр десек артық айтқаным емес. Орталық стадионға 10 мыңнан аса тұрғын жиналды. Бәрі де өз чемпионын құттықтауға, қолдауға келген. Жалпы Елдос Сметовты жақындары мен жанкүйерлері қала қақпасынан күтіп алды. Одан соң автокөлік шерумен осы стадионға дейін алып келді. Мұнда облыс басшылығы спортшыны жеңісімен құттықтап, бапкері екеуіне пәтер кілті мен автокөлік тарту етті. Чемпион атанғалы Елдосқа ел кәсіпкерлері түрлі сыйлық беріп жатқаны белгілі. Бірақ айтпағымыз, қазақта «күріштің арқасында күрмек су ішеді» деген сөз бар ғой. Соның дәлелін көріп жатырмыз. Себебі бұған дейін Елдос тұрған көшеде тасжол жоқ болған. Жергілікті билік демеуші тауып, күні кеше сол көшеге асфальт төсеп берді. Жалпы халықтың ықыласы керемет.

Орталық стадиондағы іс-шара эстрада әртістерінің концертіне ұласып жатыр. Айта кетейік, Елдос Сметовтың қазірдің өзінде қазақ спортының тарихында есімі алтын әріппен жазылары анық. Себебі ол – Олимпиаданың 3 жүлдесін де алған елдегі жалғыз дзюдошы.