Париж Паралимпиадасы еліміз үшін табысты болды

Парижде бүгін Паралимпиаданың соңғы күні, деп хабарлайды 24kz.

Қазір ақтық сайыстар болып жатыр. Бірақ біздің елдің спортшылары жарыс жолын аяқтады. Париж Паралимпиадасы Қазақстанның параспорт тарихындағы ең табысты ойын болды. Отандық параспортшыларымыз 9 жүлдені қанжығаға байлады. Оның екеуі алтын, 3-еуі күміс және 4-еуі қола. Франциядағы Қазақстан Елшісі Гүлсара Арыстанқұлова спортшыларымызды бүкіл диаспора атынан құттықтады.

Ержан Естаев, Мүмкіндігі шектеулі тұлғаларға арналған спорттық даярлау орталығының директоры:

- Нәтиже туралы айтсақ, спортшыларымыз жақсы жетістіктерге жетті, алға қойған мақсаттарды тамаша орындады. Паралимпиадашылардың жеңісімен бүкіл елімізді құттықтаймыз.

Ерғали Шамей, Париж Паралимпиада ойындарының күміс жүлдегері:

- Енді парадзюдоға 10 спортшы келді, бесеуі медаль алды. Бұл өте жоғары жетістік. Жылдар бойы тер төгіп, осы нәтижеге қол жеткіздік. Келесі Паралимпиадада бұдан да жақсы деңгейге жетеміз.