Тоғызқұмалақ тақтасы ғарышқа ұшырылды
Дүниежүзілік доданың дүбірі естілгелі ел аумағына келген шетелдіктер мен халықаралық медиа өкілдерінің санында шек жоқ.
Алдын ала болжам бойынша 100 мың турист Көшпенділер ойындарын көруге келеді деген жоспар бар. Бұл жаһан жұрты түркі халықтарының тереңнен тін тартқан тарихы мен біте қайнасқан болмысына аса қызығушылықпен қарайтынының бір белгісі десек болады. Сондай-ақ Көшпенділер ойынынмен тұспа-тұс келген Димаш Құдайбергеновтің концертін тамашалауға келген туристердің де қарасы қалың.
Қазақ даласында қанатын жайған Дүниежүзілік көшпенділер ойындарын көруге 100 мың турист келеді. Сондай-ақ дүбірлі додада жалт еткен жаңалықты қалт жібермей, жаһан жұртына ақпарат тарату үшін 64 елден 1185 БАҚ қызметкері өтінім білдірген. Сондай-ақ туристерге жайлы жағдай жасау үшін 1300 волонтер қызмет етеді.
Ержан Еркінбаев, ҚР Туризм және спорт вице-министрі:
- 2014 жылы Қырғызстанда өткен алғашқы ойындарға 19 елден 600 спортшы қатысып, мыңдаған турист пен көптеген халықаралық медианың назарын аударды. 2016 жылы қатысушы елдердің саны 62-ге жетіп, іс-шараға 40 мың турист келді. 2018 жылғы ойындарға 80 елден 2000 астам адам қатысып, көрермен саны 150 мыңнан асып жығылды. Бұл сандардан ойындар жылдан-жылға туристерді көптеп тартатынын, бұл өз кезегінде қабылдаушы елдің экономикасы мен туризм саласын дамытуға айтарлықтай үлес қосатынын көре аламыз.
Тоғызқұмалақ тақтасы ғарышқа ұшырылды
35 шақырым көкке көтерілген ойын құралының видеосы әлеуметтік желілерде тарап, көпшіліктің сүйіспеншілігін тудырды. Осылайша ұйымдастырушылар Дүниежүзілік көшпенділер ойындарының алданда жаһан жұртының назарын төл ойынымызға аударуға тырысқан.
Әлихан Бәймен, Дүниежүзілік және ҚР Тоғызқұмалақ спорты федерациясының президенті:
- Тоғызқұмалақтың дамуына осы Дүниежүзілік көшпенділер ойынының осы Астанада өтуі де жаңа серпін берді. Осы жарысқа дайындық барысында біз ғарышқа тоғызқұмалақ тақтасын ұшырдық. Ол 35 шақырым жерге барып қайтты. Сонымен қатар онлайн режимде осы 3 күннің ішінде онлайн тіркеліп, Гиннес рекордын орнатуға шара бастағанбыз. Қазірдің өзінде 170 мыңнан астам адам соған тіркелді.
Елде 5 мыңнан астам тоғызқұмалақ үйірмесі бар
Иә, ақжолтай жаңалықты ақпараттандырамыз дегенше тағы 10 мың адам тіркеліп, жалпы ойыншылардың саны 180 мыңға жеткен екен. Яғни, 100 ден аса елде осынша адам ұлттық ойынымызды ойнаған. Бұл – тоғызқұмалақ тарихында бұрын-сонды болмаған ең ауқымды сайыс. Сондай-ақ төл ойынымызды жанына серік еткен қазақстандықтардың да қарасы қалың. Қазір елде 200 мыңға жуық тоғызқұмалақшы бар. Оның 200-і – жоғары санаттағы спортшылар. Ал жаттықтырушылардың саны 2,5 мыңнан асады. Сонымен қоса 130 төреші бар.