Шахматтан «Oskemen Open-2024» халықаралық турнирі басталды

Шығыс Қазақстан облысында шахматтан «Oskemen Open-2024» халықаралық турнирі жалауын көтерді, деп хабарлайды 24kz.

Дүбірлі додаға 15 елден 200-ге жуық спортшы қатысып жатыр. Олар 9 күн бойы өзара сынға түсіп, швейцар жүйесі бойынша өзара мықтыны анықтайды. Жүлде қоры – 50 мың АҚШ доллары. Сонымен қатар бұл жарыс Қазақстан кубогінің екінші кезеңі болып саналады. Алғашқысы мамыр айында Ақтөбеде өтсе, үшіншісі қазанда Павлодарда ұйымдастырылады. Ал, финал жеңімпаздарының тізімі қарашада Астанада белгілі болады. Жалпы халықаралық деңгейдегі осындай сайыс Өскеменде бірінші рет өтіп жатыр. Еліміздің Шахмат федерациясы өкілдерінің айтуынша, бұл осы спорт түрін еліміз бойынша танытуға мүмкіндік береді. Өңірде шахмат ойынын мектептерге енгізіп, шахмат үйін ашу жоспарланып отыр.

Гүлмира Дәулетова, Қазақстан Шахмат федерациясының атқарушы директоры:

- Жалпы бұл кубоктарды өткізудің өте зор маңызы бар. Қазақстан шахмат федерациясының президенті Тимур Турлов мырза зейінді осы профессионалды шахматты дамытуға қойып отыр. Өздеріңізге белгілі, соның нәтижесін де айтуға болады. Біздің қыздарымыз жақында бүкіләлемдік олимпиадада күміс жүлдеге ие болып отыр.