Маңғыстау тәулігіне 4,5 мың текше метр су тұшытатын қондырғы іске қосылды

Маңғыстау облысында тәулігіне төрт жарым мың текше метр жерасты суын тұшытатын қондырғы іске қосылды.

Кәсіпорын 25 мың тұрғыны бар Ақшұқыр және Сайын Шапағатов ауылын тіршілік нәрімен қамтамасыз етеді. Келешекте өндіріс қуатын тағы 2 мың текше метрге жеткізу жоспарланған. Маңғыстауда ауыз су тапшылығын жою жөніндегі Президенттің тапсырмасы аясында қазір өңірде бірнеше жоба жүзеге асып жатыр.

Түпқараған ауданына қарасты қос елдімекеннің тұрғындары таза су келгеніне қуанышты. Бұрын әркім жеке құдығына су құйдыртып алатын. Енді орталықтандырылған құбырмен келетін тіршілік нәрі бақша суаруға да жетеді, деп отыр. Ауыл тұрғыны Руслан Бағдатов бұған дейін өз күшімен қазып алған ұңғыманың суын пайдаланыпты.

Руслан Бағдатов, ауыл тұрғыны:

- Скважина қаздыртқан болатынбыз. Сонымен суаратын едік, онымен өсімдігіміз дұрыс шықпайды. Ащы су болғасын.

Олжас Қаржауов, кәсіпкер:

- 25 мың адамды сумен қамтитын боламыз. Жазды күндері сол 2 мыңдай куб жетеді деп жоспарлап отырмыз. Жетпейтін болса, 3-4 мыңға көтереміз боламыз әр ауылға.

Жеке кәсіпкер қолға алған жоба құны 1 млрд теңге. 565 млн теңгесін «Халық» қоры бөлді. Ауыл тұрғындарымен кездесуде аймақ әкімі Нұрдәулет Қилыбай ауыз сумен қамтуға бағытталған бірнеше жоба күзге дейін жүзеге асатынын айтты.

Нұрдәулет Қилыбай, облыс әкімі:

- Бұйырса, келесі апта Маэк су тұщыту зауытында 6 мың куб қосылады. Одан кейін мына жерде Ақтау су тұщыту зауыты алдымыздағы апта 9 мыңға жеткізеді. Қазір 3-4 мыңның айналасында шығарып отыр. Одан кейін Каспий су тұщыту зауытының құрылғылары осы апта араб елінен авиациямен шығады. Келесі апта кедендік бақылаудан өткеннен кейін зауытқа жеткізіледі.

Шілде айының соңына дейін Каспий зауытының қуатын екі еселеу, яғни 40 мың текше метрге жеткізу жоспарда. Нәтижесінде Ақтау қаласы және іргелес елдімекендерде ауыз су тапшылығы жойылады. Ал тамыздан бастап Баянды ауылындағы тұщыту қондырғысы тәулігіне қосымша 3 мың текше су өндіріп, Мұнайлы ауданына жібереді. 

Талғат Исламұлы, Саламат Бекбаев