Тұтынушы таңдауы. Нан өндірісі

Адам баласы қорек ететін азықтардың ішінде өмір бойы мәзірден түспейтін, оны жегенде зерікпейтін, жалықпайтын бір қоректік зат бар. Ол - ас атасы нан. Өзге ұлттарды қайдам, қазақтың нансыз күні жоқ десек ешкім дауласпас. Тіпті халқымызда «қара су ішіп, қара нан жесек те, амандық болсын» деген сөзі бар ғой. Нанның қасиеттілігінің өзі осыдан-ақ көрінеді. Бірақ негізгі тамақтану өніміміздің бұл күнде біз қадірін қаншалықты бағалап жүрміз? Халық қазір қандай нан жеп жүр? Бірге жауап іздеп көрелік.