Елордада болашақ судьяларға диплом табысталды

Елордада Жоғарғы Сот Кеңесінің жанындағы Сот төрелігі академиясында магистратура түлектеріне диплом табыстау рәсімі өтті.

Жас мамандардың дені судья лауазымына арналған біліктілік емтиханын сәтті тапсырды. Биыл білім ордасының құрылғанына 10 жыл. Бұл елдегі судьялыққа кандидаттарды кәсіби даярлайтын және сот жүйесі қызметкерлерінің біліктілігін арттыратын жалғыз мамандандырылған жоғарғы оқу орыны. Осы жылы елде жалпы саны 159 жаңа судья тағайындалды. Оның 82-сі академия түлектері. Бүгінде жастар арасында бұл мамандыққа қызығушылық едәуір артқан. Егер бұрын бір бос орынға орта есеппен 25 үміткер қатысса, қазір бұл көрсеткіш 95 адамға жеткен. 

Дмитрий Малахов, ҚР Жоғарғы сот кеңесінің төрағасы:

- Магистр дәрежесін алу білім жолындағы маңызды кезеңнің сәтті аяқталуы ғана емес, сонымен бірге заңға, әділдікке және қоғам мүддесіне қызмет етуге дайын екендіктеріңіздің айқын дәлелі. Сот төрелігі академиясында алған білімдеріңіз, практикалық дағдыларыңыз бен кәсіби құзыреттеріңіз алдағы кәсіби дамуларыңызға және өз әлеуеттеріңізді толық жүзеге асыруға берік негіз болады деп сенемін.