IPHO-2024: қазақстандық оқушыларымыз жүлдегер атанды
Ел оқушылары IPHO-2024 халықаралық олимпиадасында жүлдегер атанды, деп хабарлайды 24kz.
Қазақстан құрамасы физика пәнінен өткен білім бәсекесінде 5 медаль қанжығалады. Пәндік жарыстар арасында шоқтығы биік Олимпиада биыл Иранда өтті.
Бұл Иран елінің Исфаһан қаласында өткен халықаралық Олимпиада жүлдегерлерін марапттау сәті. Жарысқа барған 5 оқушы да білім додасының биігінен көрінді. Нақтырақ айтсақ, 4 оқушы күміс медаль жеңіп, біреуі қоланы қанжығалады.
Команда мүшелері әр өңірдің мектептерінен іріктеліп алынған. Оларды әуежайдан мектеп ұжымы мен туысқандары күтіп алды. Білім бәйгесінде екінші орын алған Марғұлан Нұрсағатов 11-сыныпты осылайша, жеңіспен қорытындылады.
Марғұлан Нұрсағатов, IPHO-2024 жүлдегері:
- Біз барлық пәндер бойынша олимпиадалық дайындық пен білімді тағы бір деңгейге көтеруіміз керек. Себебі, алтын медальға ұпайымыз сәл жетпей қалды. Былтыр бірінші рет қатысқанда қатты қобалжыдым, биыл өзімді байсалды ұстадым. Тапсырмалар ауыр әрі күрделі болды.
Биыл IPHO-2024 халықаралық олимпиадасына 46 елден 200-ден аса оқушы қатысқан. Оларға теориялық кезеңде үш есеп беріліпті. Әр тапсырма 15-20 беттен тұрады екен. Мектеп бағдарламасына сай болса да, күрделі тапсырманы 5 сағатта орындау керек. Екінші кезеңде қатысушыларға практикалық тапырма беріледі.
Самат Мақсұтов, Қазақстан құрама командасының жетекшісі:
- Екінші тур эксперимент немесе зертханалық жұмыс дейміз. Бұл да мектеп тақырыбы бірақ деңгейі өте жоғары. Бұл зертханаға құрал-жабдықтарын арнайы тапсырыспен істейді. Осы жылы да солай болды. Бұны дүкеннен, мектептен немесе университеттің базасынан таба алмайсыз. Тақырыбы мектепке сәйкес келеді бірақ құрал-жабдықтары арнайы тапсырыспен жасалады.
Мектеп оқушылары үшін шоқтығы биік Олимпиада жыл сайын өтіп тұрады. Әлемде математика, физика, химия, биология сынды 7 пәннен беделді олимпиада бар. Оған қатысу – кез келген баланың арманы. Осы жарыстарда біздің оқушылар жүлделі орындардан көрініп келеді.
Авторлары: Аршын Кемелжан, Эдуард Кон, Сұлтан Бейсекенов