Назарбаев Университетінде түлектер кездесуі өтті
Бүгін Назарбаев Университетінде бесінші мәрте түлектер кездесуі өтті.
Олар өздерінің жетістікке жету жолындағы тәжірибелерімен бөлісіп, өзара пікір алмасты. Орталық Азиядағы жетекші оқу орындарының бірі он жылда он мыңнан астам маман дайындаған. Олардың қатарында, белгілі кәсіпкерлер, стартаптардың негізін қалаушылар, дәрігерлер мен ғылым және білім салаларындағы көшбасшылар да бар.
Аружан Мейірханова Назарбаев университетінде саясаттану және халықаралық қатынастар мамандығында оқыған. Ол бакалаврдағы білімін жетілдіру мақсатында Гарвард университетіне оқуға түсіп, аймақтық зерттеулермен айналысқан.
Аружан Мейірханова, Назарбаев Университетінің түлегі:
- Мен ойлаймын Назарбаев университеті ол ең бірінші әлеуметтік лифт деп. Бүкіл менің зерттеу жұмыстарыма қатысты қандай да бір жеткен жетістіктерім болса осы білімнің арқасы деп білемін.
Орталықта ата-аналар мен оқушыларды жоғары оқу орнына түсу шарттарымен таныстыру мақсатында Family Fun Day шарасы өтті. Ашық есік күніне қатысушылар Назарбаев университетіне қатысты өз ойларымен бөлісті.
Тілеуберген Бөлембаев, ата-ана:
- Оның рейтингі өте жоғары. Орталық Қазақстандағы ең жоғары рейтингтегі университетке кіретінін білемін. Өте керемет жетістіктері бар екен. Студенттері Гарвардта да оқыған.
Назарбаев Университеті негізі қаланған 14 жыл ішінде білім сапасы бойынша әлемдік рейтингте үздік университеттер қатарына енді. Айта кеткен жөн, биыл ақылы бөлімге оқуға түсуге ниетті студенттерге қойылатын талаптар да жеңілдетілді. Енді олар шет тілінен емтихан тапсырса жеткілікті.
Қадиша Дайырова, студенттер ісі және халықаралық ынтымақтастық жөніндегі вице-президент:
- Бізде ағылшын тілін жетік меңгермеген студенттерге алғашқы жылдары оқытылатын университет алдындағы дайындық бағдарламасы қарастырылған. Мұнда олар тілді жоғары деңгейде үйреніп шығады.
Университет бизнес, компьютерлік ғылымдар, инженерия, жасанды интеллект, мұнай-газ ісі, медицина сынды сұранысқа ие мамандықтар бойынша дайындайды. Ал түлектер Google, Amazon, Apple, Meta және үздік қазақстандық жеке және квазимемлекеттік компанияларда жұмыс істейді.
Дильназ Тұрғазыева, Руслан Алиев