Ұзынкөлде «Үздік аула» және «Таза аумақ» байқауы өтіп жатыр
«Таза Қазақстан» бағдарламасы аясында Қостанай облысының Ұзынкөл ауданында «Үздік аула» және «Таза аумақ» байқауы жарияланды, деп хабарлайды 24KZ.
Оның бірінші кезеңінде арнайы комиссия лайықты деген елді мекен мен жеке аулаларды іріктеп алды. Кейін арасынан үздіктері анықталады.
Ұзынкөл ауданының аумағында 32 елді мекен бар. «Таза Қазақстан» экологиялық акциясы басталғалы сәуір айынан бергі аралықта сол ауылдардан 9 мың тонна қоқыс шығарылды. Тек тазартып қана қоймай, көше, аулаларды абаттандыру жұмысы да қолға алынып жатыр. Халықты осы іске ынталандыру үшін арнайы байқау жарияланды.
Ғабит Ерғалиев, аудандық ішкі саясат бөлімінің басшысы:
- Байқаудың бірінші кезеңі өтті. Бірқатар ауылдық округтарда үздік елді мекендер анықталды. Әзірге тазалығы, тәртібі жағынан Троебратный мен Пресьнегорков ауылдары көш бастап тұр. Жалпы бұл байқауды жергілікті халық жақсы қабылдады. Қатысуға ниет білдіргендер көп.
«Үздік аула» байқауында жеңімпаз болудан үмітті тұрғындардың бірі – Василий Кнауц. Оның ауласы шынымен әсемдігімен көз тартады. Жағалай жасыл желек, ертегі кейіпкерлерінің мүсіні, субұрқақ – бәрі әдемі үйлесім тауып тұр.
Василий Кнауц , Ұзынкөл ауылының тұрғыны:
- Осының бәрін өзі қолымызбен жасадық. Ескі асфальтты қырып тастап, топырақ төсеп, шөп ектік. Осындай көрікті, таза аулаларды көрген адам өзі де соған ұмтылады. Әрине, бәрі жақсы тұрғысы келеді, бірақ көбі соның жолын біле бермейді. Соларға үлгі, тәрбие ретінде көрсетуіміз керек.
Ұзынкөлде «Үздік аула» байқауына қатысуға 44 отбасы өтініш берген. Тамыз айында басында байқаудың бірінші кезеңінің қорытындысы шығарылды.
Ғабит Ерғалиев, аудандық ішкі саясат бөлімінің басшысы:
- Ұзынкөл ауылы бойынша 6 үй, 2 мекеме іріктеуден өтті. Осы үй, мекеме аулаларында күз айына дейін тазалық қалай сақталатындығы бақыланады. Шамамен қыркүйектің соңында байқау қорытындысы шығарылып, жеңімпаздар ақшалай сыйлықпен марапатталады.
Келер жылы Ұзынкөлде «Үздік аула» байқауына қатысушылардың санын жүзге жеткізу межеленіп отыр.
Авторлары: Мағауия Қалиев, Сергей Трахтенберг.