Бұқара - Орал газ құбырының қуаты артады

«Бұқара - Орал» магистральді газ құбырының үшінші желісінің құрылысы басталды.

Жаңа жоба Ақтөбе облысындағы көгілдір отын тапшылығын толық шешуі тиіс. Қазір қолданыстағы газ құбырының жүктемесі 170 процентке жеткен. Сондықтан 165 шақырымға созылатын жаңа тасымалдаушы желіні жүргізу туралы шешім қабылданған. Құны 43 миллиард 400 миллион теңге болатын жоба келер жылы салынып бітуі керек. Алғашқы кезеңнің құрылыс-монтаж жұмыстарына облыстық және республикалық бюджеттен 11 миллиард теңге бөлінді.

Ержан Мұздыбаев, Энергетика және ТҮКШ басқармасының басшысы:

- Бұл құбырды салу нәтижесінде осы Ақтөбе қаласы мен жақын орналасқан елді мекендерге қосымша 526 мың шаршы метр газ жететін болады. Яғни бұл дегеніміз біздің 40-50 жылға дейінгі газ тұтыну көлемін арттырады. Сонымен қатар облысымыздағы 3 трлн қаражатқа жуық 30 ірі инвестициялық жобаларды қамтамасыз ететін болады.