Өскеменде көлік велосипедшілер колоннасына соғылды: алты жасөспірім зардап шекті

Өскемен қаласында жеңіл автокөлік велосипедшілер колоннасына соғылып, салдарынан алты кәмелетке толмаған жасөспірім медициналық көмекке жүгінді, деп хабарлайды «24KZ». 

Шығыс Қазақстан облыстық полиция департаментінің мәліметінше, жол-көлік оқиғасы 27 мамыр күні Ертіс өзеніндегі көпірде болған. Toyota Avensis маркалы автокөліктің жүргізушісі қозғалыс кезінде екінші жолаққа бұрылмақ болған. Алайда маневр жасау барысында жол қауіпсіздігіне көз жеткізбей, велосипедшілер колоннасымен соқтығысқан.

Оқиға салдарынан бірнеше жасөспірім түрлі дене жарақатын алған. Дәрігерлер оларға алғашқы медициналық көмек көрсеткен. Зардап шеккендердің нақты жағдайы туралы ақпарат нақтыланып жатыр.

Куәгерлердің айтуынша, оқиға болған сәтте көпір бойында қозғалыс қарқынды болған. Соққыдан кейін велосипедшілер жол жиегіне құлаған.

Қазіргі уақытта аталған факті бойынша полиция тексеру жүргізіп жатыр. Оқиғаның барлық мән-жайы анықталғаннан кейін процессуалдық шешім қабылданады.

Полиция жүргізушілерге жол қозғалысы кезінде мұқият болып, әсіресе балалар мен велосипедшілер жүрген аумақтарда қауіпсіздік талаптарын қатаң сақтауды ескертті.

27 мамыр күні  Астанада жүк көлігі велосипед мінген жасөспірімді қағып,  жеткіншек оқиға орнында көз жұмған.