Солтүстік Қазақстанда 50 тонна сазды заңсыз өндіру фактісі анықталды
Солтүстік Қазақстан облысында сазды заңсыз өндіру және жер қойнауын пайдаланушылар тарапынан заң бұзушылықтар анықталды. Келтірілген залал көлемі шамамен 40 млн теңгені құрады, деп хабарлайды 24KZ Бас прокуратураға сілтеме жасап.
Прокуратура жүргізген талдау барысында жер қойнауын өз бетінше пайдалану және жер қойнауын пайдаланушылардың келісімшарттық міндеттемелерін орындамау фактілері анықталған.
Мәселен, ағымдағы жылдың 7 тамызында Петропавл қаласының маңында кәсіпкерлік субъектісі Қазақстан Республикасының Жер қойнауы және жер қойнауын пайдалану туралы Кодексінің (бұдан әрі - Кодекс) талаптарын бұза отырып, арнайы техниканы қолдана отырып, кең таралған пайдалы қазбаларды (сазды) заңсыз өндіруді жүзеге асырды. Шығарылған топырақ көлемі 50 тонна болды, - делінген хабарламада.
Аталған факт Петропавл қаласы полиция басқармасының ақпаратты есепке алу кітабына тіркеліп, тиісті шара қабылдау үшін облыстық экология департаментіне жолданған.
Департаменттің 2026 жылғы 18 тамыздағы қаулысымен кәсіпкерлік субъектісі Қазақстан Республикасының Әкімшілік құқық бұзушылық туралы кодексінің 139-бабы бойынша айыппұл түрінде әкімшілік жауаптылыққа тартылды.
Сонымен қатар 2024–2025 жылдары 11 жер қойнауын пайдаланушы Кодекс талаптарына қайшы, өңірдің әлеуметтік-экономикалық дамуына жалпы сомасы 10,5 млн теңгеге қаражат аудармаған.
Басқа жағдайда, жер асты суларын пайдалануды жүзеге асыратын 26 субъект салық заңнамасының талаптарын бұза отырып, жалпы сомасы 29 млн теңге қол қою бонусын төлемеген.
Прокурорлық қадағалау актілері бойынша мемлекет пайдасына 18 млн теңге өндірілді, қалған соманы өндіру бойынша жұмыс жалғасуда.
Қадағалау органы жеке және заңды тұлғаларға жер қойнауын өз бетінше пайдаланғаны үшін заңда белгіленген жауаптылық туралы еске салады және қолданыстағы заңнаманың талаптарын сақтауға шақырады.
