Астанада түнгі уақытта пиротехника атып, тұрғындардың тыныштығын бұзған 26 құқық бұзушы жауапқа тартылып, олардың басым бөлігі қамауға алынды, деп хабарлайды «24KZ».
Соңғы уақытта елордалықтардың мазасын қашырған жағымсыз үрдіс белең алды. Тұрғын үйлердің ауласында қатты музыка қосып, түнгі уақытта отшашу арқылы туған күн иелерін құттықтау әдетке айнала бастаған. Мұндай тосынсыйлар көліктердің дабылын жаппай іске қосып, тәтті ұйқыдағы тұрғындардың орынды наразылығын тудырып отыр.
Осыған орай, Астана қаласының прокуратурасы бұл мәселеге қатысты құқық бұзушыларды Әкімшілік құқық бұзушылық туралы кодекстің 434-бабының 1-бөлігі «Ұсақ бұзақылық» бойынша жауапкершілікке тартуда.
Қазіргі таңда қала бойынша осындай заңсыз әрекеттерді жасаған 26 құқық бұзушы анықталып, әкімшілік жауапкершілікке тартылды. Олардың ішіндегі 19 азамат сот шешімімен 10 тәулікке дейін қамауға алынды. Сондай-ақ заңнама талаптарына сәйкес, 14 жасқа дейінгі балаларды тәрбиелеп отырған 6 әйелге және 1 кәмелетке толмаған жасөспірімге айыппұл салынды.
Құқық қорғау органдары мұндай әрекеттердің тек тыныштықты бұзып қана қоймай, үлкен қатер төндіретінін ескертеді. Атап айтқанда, түнгі уақытта, адамдар көп жиналатын орындарда, тұрғын үйлер мен автокөліктердің маңында пиротехникалық құралдарды іске қосу азаматтардың өміріне, денсаулығына, мүлкіне және өрт қауіпсіздігіне тікелей қауіп төндіреді.
Осыған байланысты Астана қаласының прокуратурасы елорда тұрғындары мен қонақтарына үндеу жасай отырып, өзгенің тыныштығын құрметтеуге, қоғамдық тәртіпті қатаң сақтауға және қала тұрғындарының жайлылығына немқұрайлы қарамауға шақырады. Құқық тәртібін бұзушыларға қарсы мұндай профилактикалық және қатаң шаралар алдағы уақытта да жалғасын таппақ.
