ШҚО-да 4 ауыл ауызсусыз қалуы мүмкін

Шығыс Қазақстан облысы Шемонаиха ауданына қарасты 4 ауыл ауызсусыз қалуы мүмкін, деп хабарлайды «Хабар 24».

Елді мекендердегі орталық су жүйесі істен шығып жатыр. Құбырлар инженерлік коммуникацияның тозуынан бұзылған.

Первомайский кентінің тұрғындары әкімдіктен көмек күтпей-ақ, апатты жағдайдағы құдықтарды жөндеуге кіріскен.

Десе де ауыл тұрғындары мәселені шешуге қауқарсыз. Коммуникацияны қалыпқа келтіру үшін қыруар қаржы керек.

Валерий Корнеев, Первомайский кентінің тұрғыны:

- Су құбырлары тесіліп жатыр. 10 метр сайын ақаулар анықталды. Оған қоса кей жерлері шіріп кеткен.

Елді мекендегі орталықтандырылған жүйенің жағдайы осындай. Құбырлар шіріп кеткендіктен, судың түсі өзгеріп, сапасы нашарлаған.  

Бұл сорғы станциясы суды Ертістен алып, тазартады. Өзеннің деңгейі төмендесе болды, тіршілік нәрін тарту қиындай түседі. Бұған дейін ауылды тіршілік нәрімен қамту үшін артезиан ұңғымаларын пайдалану мәселесі көтерілген. Алайда экологиялық жоба аяқсыз қалды.

Николай Микенин, Первомайский кентінің тұрғыны:

- Бұл мәселе туралы 8 жыл бойы айтып келемін. Жерасты суын тарту туралы мәселені шенеуніктерге сан рет жеткіздік. Нәтиже жоқ. Біз күтуден шаршадық.

Өзекті мәселе жергілікті биліктің жіті назарында. Алдағы уақытта жаңа сорғы станциясын салуға қаражат бөлінеді. Бірақ жобаны іске асыруға кем дегенде 1 жыл керек.

Бакытжан Молдаханов, Шемонаиха ауданы әкімінің орынбасары:

– Су құбырларын жөндеуге аудандық бюджеттен 90 млн теңге қаражат бөлінді. Тамыз-қыркүйек айларында жұмыстар толығымен жүргізіліп, қысқа дайындық аяқталатын болады. Сонымен қатар Первомайский кентінде екінші жобаны іске асыру жоспарланып отыр. Ертіс өзенінің жағасында жаңадан су ұңғымаларын орнату, таза суды халыққа жеткізу. Жобалық-сметалық құжаттамысы дайын. Қаражат бөлуге өтінім берілді.

Жаңа ұңғымаларды орнатуға 240 млн теңге қажет. Жоба қолдау тапса, келесі жылы жүзеге асырылылады.

Авторлары: Ақмарал Есімханова, Вячеслав Ветлугин, Жігер Бабаханов.