Ақтөбеде 14 жас кәсіпкер шағын грантқа ие болды
Ақтөбеде «Zhas Project» жобасының жеңімпаздары анықталды, деп хабарлайды 24KZ.
Байқауда топ жарған 14 жас кәсіпкер бір миллион теңгеге дейінгі шағын гранттарға ие болды. Биылғы байқауға қатысушылар арасында ерекше әлеуметтік жоба ұсынғандар да бар.
Айбат Жақсығұл – әлеуметтік жобалар байқауына қатысып, жеңімпаз атанғандардың бірі. Инженер-технолог мамандығын меңгерген ол сайысқа балалардың ойлау және сөйлеу қабілетін дамытуға оң әсер ететін ойыншықтар жасау жоспарын ұсынған. Айтуынша, бұл ұлттық болмысты насихаттауға да септігін тигізеді.
Айбат Жақсығұл, қала тұрғыны:
- Ұлттық аспаптар, ұлттық тағамдарды, жеті қазынамыз бар, сол нәрселердің барлығын мына ойыншықтар арқылы көрініс беріп, сол арқылы баланы дамытуға, бір жағынан, өзіміздің қазақилықты дамытуға үлес қосу.
«Zhas Project» шағын гранттар байқауы 18 бен 35 жас аралығындағы жұмыссыз жастарды кәсіпке баулуға бағытталған. Бұл жолы облыс бойынша 289 өтініш қабылданып, арнайы құрылған комиссия үздіктерін іріктеді. Нәтижесінде 14 жоба жеңімпаз деп танылды. Олардың авторларына іс бастау үшін бір миллион теңгеден табыс етілді.
Нұрсұлтан Қалдыбай, комиссия мүшесі:
- Жобалар әр алуан, бір-біріне ұқсамайды. Оның ішінде ауыл шаруашылығына қатысты 3 жоба болды. Соның өзі бірқалыпты жағдайдағы емес, басқаша бір ғылымды ұштастырған сондай жобалар болды. Жаңа салаларды қамтитын, әлеуметтік салаларды қамтитын мықты-мықты жобалар келіп қорғалды.
Ләззат Жаманқұлова, жобаның менторы:
- Біз жеңімпаздарды алдымен екі апта бойы кәсіпкерлік негіздерін меңгеруге оқытамыз. Курс онлайн режиімінде жүреді. Атап айтқанда, макертинг, мобилография әдіс-тәсілдерін үйретеміз. Сосын бір миллион теңге ұтқандарға қажетті жабдықтарын алып беріп, ісін бастаймыз. Бірақ олардың кәсібін бақылайтын боламыз. Қалай жүріп жатқанын көреміз.
Байқау жеңімпаздарына қойылатын талап та бар. Олар өз жобаларын іске асырып қана қоймай, өзгелермен тәжірибе бөлісіп, кәсіп бастаудың қыр-сырын үйретуі қажет.
Авторлары: Әнуарбек Мырзатайұлы, Айнадин Молдабеков.